اسلام آباد ( پاک ترک نیوز) صدر مملکت آصف علی زرداری نے نوجوانوں کے عالمی دن پر پاکستانی نوجوانوں کو خراجِ تحسین پیش کرتے ہوئے کہا ہے کہ نوجوانوں کی توانائی، تخلیقی صلاحیت اور عزم پاکستان کا قیمتی اثاثہ ہے۔
صدر زرداری نے کہا کہ نوجوانوں کو بااختیار بنانا پاکستان کے مستقبل میں سرمایہ کاری ہے، جبکہ معیاری تعلیم، باعزت روزگار اور جدت نوجوانوں کی مشترکہ خواہشات ہیں۔
انہوں نے کہا کہ پاکستان کی تقریباً 67 فیصد آبادی 30 سال سے کم عمر افراد پر مشتمل ہے، نوجوان ملک کا سب سے بڑا انسانی سرمایہ ہیں۔
صدر مملکت کے مطابق نوجوان خواتین کی صلاحیتیں اور قیادت ملکی سماجی و معاشی ترقی کے لیے ناگزیر ہیں۔ وزیراعظم یوتھ پروگرام نوجوانوں کو تعلیم، ہنر، روزگار اور کاروبار کے مواقع فراہم کر رہا ہے۔
آصف علی زرداری نے نوجوانوں پر زور دیا کہ وہ دیانت داری، ہمدردی اور برداشت کی اقدار اپنائیں۔ نوجوانوں کو قومی ترقی میں فعال کردار ادا کرنے کے لیے بااختیار بنانا وقت کی اہم ضرورت ہے۔
صدر مملکت نے کہا کہ مضبوط، جامع اور خوشحال پاکستان کی تعمیر نوجوانوں کی بھرپور شرکت سے ہی ممکن ہے۔
