کراچی(پاک ترک نیوز ) گلشنِ حدید میں پانچ افراد کی موت کے واقعے سے متعلق ابتدائی پوسٹ مارٹم رپورٹس پولیس حکام کو موصول ہوگئی ہیں، جن میں شاہزیب اور ان کی اہلیہ صبا کو گولیاں لگنے کی تصدیق ہوئی ہے، جبکہ دیگر افراد کی موت کی وجوہات جاننے کے لیے نمونے تجربہ گاہ بھیج دیے گئے ہیں۔
پولیس حکام کے مطابق ابتدائی رپورٹ میں بتایا گیا ہے کہ شاہزیب کو سر کے بائیں جانب گولی لگی، جو دائیں جانب سے باہر نکل گئی، جبکہ ان کی اہلیہ صبا کو سر کے دائیں جانب گولی لگی، جو بائیں جانب سے باہر نکلی۔
حکام کے مطابق جائے وقوعہ سے گولیوں کے تین خول ملے تھے۔ شاہزیب اور ان کی بہن شمائلہ کے ہاتھوں سے بھی بارود کے ذرات کے نمونے حاصل کیے گئے ہیں۔
رپورٹ کے مطابق شمائلہ کی لاش کے نمونے بھی حاصل کیے گئے، جبکہ ان کے منہ سے جھاگ نکلنے کا مشاہدہ کیا گیا۔ دونوں بچیوں کے منہ سے بھی جھاگ نکل رہے تھے۔
پولیس حکام کا کہنا ہے کہ شاہزیب کی بہن اور بچیوں کے مختلف اعضا سے حاصل کیے گئے نمونوں کی تجربہ گاہ سے رپورٹ آنے کے بعد موت کی اصل وجوہات معلوم ہو سکیں گی۔ واقعے کی تحقیقات جاری ہیں۔
