اسلام آباد(پاک ترک نیوز ) وفاقی بورڈ آف ریونیو نے پہلی بار ٹیکس گوشوارہ جمع کرانے والے افراد سے 25 ہزار روپے کی اضافی فیس وصول کیے بغیر ان کے گوشوارے وصول کرنا شروع کر دیے ہیں، جس کے بعد وہ فعال ٹیکس دہندگان کی فہرست میں شامل ہو سکیں گے۔
ٹیکس ماہر عامر شریف کے مطابق حال ہی میں ایک ایسے شخص کا ٹیکس گوشوارہ جمع کرایا گیا جو پہلی مرتبہ ٹیکس نظام میں شامل ہوا تھا، اور اس کا نام اضافی فیس ادا کیے بغیر فعال ٹیکس دہندگان کی فہرست میں شامل کر دیا گیا۔
انہوں نے بتایا کہ اگر کوئی شخص ٹیکس سال 2026 کا اپنا ٹیکس گوشوارہ جمع کراتا ہے تو عام طور پر 24 گھنٹوں کے اندر اس کا نام فعال ٹیکس دہندگان کی فہرست میں شامل ہو جاتا ہے۔
عامر شریف کے مطابق اس پیش رفت سے وہ ابہام بھی ختم ہو گیا ہے کہ آیا پہلی مرتبہ ٹیکس گوشوارہ جمع کرانے والوں کو 25 ہزار روپے کی اضافی فیس ادا کرنا ہوگی یا نہیں۔ اب ایسے افراد بغیر اضافی فیس کے فعال ٹیکس دہندہ بن سکتے ہیں۔
یہ بھی پڑھیں: امریکا ،ایران جنگ بندی ، عالمی منڈی میں تیل کی قیمتوں میں بڑی کمی
انہوں نے کہا کہ اس اقدام سے ان افراد کو بڑی سہولت ملے گی جن کے مالی لین دین فعال ٹیکس دہندہ نہ ہونے کی وجہ سے متاثر ہو رہے تھے۔
دوسری جانب ایف بی آر نے ٹیکس سال 2026 کے لیے انکم ٹیکس گوشوارے جمع کرانے کا آن لائن نظام باضابطہ طور پر کھول دیا ہے۔ ٹیکس دہندگان 30 ستمبر 2026 تک اپنے گوشوارے جمع کرا سکتے ہیں۔
