لاہور( پاک ترک نیوز) پنجاب کے وزیر مواصلات و تعمیرات ملک صہیب احمد بھرتھ نے لوکل روڈ پروگرام کے تحت مزید 82 سڑکیں 7 ستمبر تک مکمل کرنے کی ہدایت کردی۔لاہور میں اجلاس کی صدارت کرتے ہوئے صوبائی وزیر نے فیلڈ افسران کو جاری ترقیاتی منصوبوں کی سخت نگرانی اور مقررہ مدت میں تکمیل یقینی بنانے کا حکم دیا۔ اجلاس میں سیکریٹری مواصلات و تعمیرات راجا جہانگیر انور، اسپیشل سیکریٹری، ایڈیشنل سیکریٹریز اور دیگر اعلیٰ افسران شریک ہوئے، جبکہ سپرنٹنڈنگ انجینئرز اور ایگزیکٹو انجینئرز نے آن لائن شرکت کی۔
اجلاس میں لوکل روڈ پروگرام کے تحت پنجاب کے شمالی، وسطی اور جنوبی علاقوں میں جاری کام پر بریفنگ دی گئی۔ حکام نے بتایا کہ مکمل ہونے والی سڑکوں پر سائن بورڈز، لین مارکنگ اور خوبصورتی کے کام تیزی سے جاری ہیں، جبکہ دیہی اور شہری علاقوں کی سڑکوں کی تزئین و آرائش بھی کی جارہی ہے۔صوبائی وزیر نے فیلڈ فارمیشنز کو مزید 82 سڑکیں مکمل کرنے کا ہدف دیتے ہوئے چیف انجینئرز کو ہدایت کی کہ جنوبی پنجاب میں 26، شمالی پنجاب میں 33 اور وسطی پنجاب میں 23 سڑکیں 7 ستمبر تک مکمل کی جائیں۔
یہ بھی پڑھیں: امام الحق کے انجری معاملے پر تحقیقات ہوں گی، عاقب جاوید کا سخت مؤقف
ملک صہیب احمد بھرتھ نے تمام افسران کو لوکل روڈ پروگرام کے تحت جاری منصوبے مقررہ مدت میں مکمل کرنے کی ہدایت کرتے ہوئے فیلڈ فارمیشنز میں خالی آسامیوں پر افسران کی فوری تعیناتی کا حکم بھی دیا۔
