اسلام آباد(پاک ترک نیوز ) حکومت نے مقامی ہائبرڈ برقی گاڑیوں پر سیلز ٹیکس میں 7 فیصد کمی کردی، 2 ہزار سی سی تک کی مقامی ہائبرڈ گاڑیوں پر اب 18 فیصد سیلز ٹیکس نافذ ہوگا۔
وزارت خزانہ نے ہائبرڈ برقی گاڑیوں پر سیلز ٹیکس میں کمی کا باضابطہ نوٹیفکیشن جاری کردیا ہے، جس کے بعد 25 فیصد سیلز ٹیکس کی شرح کا اطلاق ختم کردیا گیا۔
ایس آر او 1525 کے تحت 2 ہزار سی سی تک کی مقامی ہائبرڈ گاڑیوں کو 25 فیصد سیلز ٹیکس کی شرح سے مستثنیٰ قرار دے دیا گیا ہے، جبکہ 18 فیصد کی نئی شرح فوری طور پر نافذ العمل ہوگی۔
حکومت کی جانب سے بجٹ سے قبل ہائبرڈ گاڑیوں پر سیلز ٹیکس کی شرح 8 سے 12 فیصد کے درمیان تھی، تاہم بجٹ کے بعد اسے بڑھا کر 25 فیصد کردیا گیا تھا۔
اب حکومت نے ہائبرڈ گاڑیوں کے لیے سیلز ٹیکس کی شرح دوبارہ کم کردی ہے، جس سے مقامی ہائبرڈ گاڑیوں کی قیمتوں میں کمی کی راہ ہموار ہوگئی ہے۔
حکومت کی جانب سے برقی اور ہائبرڈ گاڑیوں کے لیے ٹیکس پالیسی میں مسلسل تبدیلیاں کی جارہی ہیں، نئی شرح روایتی گاڑیوں کے مقابلے میں بھی نسبتاً کم رکھی گئی ہے۔
