وزیراعظم محمد شہباز شریف سے ملائیشیا کے وزیر داخلہ داتو سری سیف الدین نسوتیون اسماعیل نے وزیراعظم ہاؤس اسلام آباد میں ملاقات کی۔ وزیراعظم نے ملائیشین وزیر داخلہ کا خیرمقدم کرتے ہوئے وزیراعظم انور ابراہیم کے لیے نیک خواہشات کا اظہار کیا اور ان کی جلد صحت یابی کے لیے دعا کی۔
ملاقات میں پاکستان اور ملائیشیا کے درمیان برادرانہ تعلقات کو مزید مضبوط بنانے پر اتفاق کیا گیا۔ وزیراعظم نے سکیورٹی، قانون نافذ کرنے والے اداروں، تجارت اور سرمایہ کاری سمیت مختلف شعبوں میں تعاون بڑھانے پر زور دیا۔
دونوں رہنماؤں نے علاقائی صورتحال پر بھی تبادلہ خیال کیا۔ وزیراعظم شہباز شریف نے علاقائی امن کے لیے پاکستان کی کوششوں کی ملائیشیا کی جانب سے حمایت کو سراہا۔
ملائیشیا کے وزیر داخلہ نے وزیراعظم انور ابراہیم کی جانب سے شہباز شریف کے لیے نیک تمناؤں کا پیغام پہنچایا اور پاکستان کے ساتھ دوطرفہ تعلقات مزید مستحکم کرنے میں ملائیشیا کی گہری دلچسپی کا اظہار کیا۔
اس موقع پر وزیراعظم شہباز شریف نے پاکستان اور ملائیشیا کے درمیان سزایافتہ افراد کی منتقلی کے معاہدے پر دستخط کی تقریب میں بھی شرکت کی۔ معاہدے پر ملائیشیا کے وزیر داخلہ داتو سری سیف الدین نسوتیون اسماعیل اور وفاقی وزیر داخلہ سید محسن رضا نقوی نے دستخط کیے۔
ملاقات میں نائب وزیراعظم و وزیر خارجہ اسحاق ڈار، وزیر مملکت برائے داخلہ طلال چوہدری، وزیراعظم کے معاون خصوصی طارق فاطمی اور دیگر اعلیٰ حکام بھی موجود تھے۔
