اسلام آباد(پاک ترک نیوز ) وزیراعظم شہباز شریف سے گوگل کے 9 رکنی وفد نے ملاقات کی، وفد کی قیادت گورنمنٹ افیئرز اینڈ پبلک پالیسی کے نائب صدر ولسن وائٹ نے کی، جبکہ اسلام آباد میں امریکی سفارتخانے کی ناظم الامور نٹالی بیکر بھی وفد کے ہمراہ تھیں۔
ملاقات میں پاکستان میں ڈیجیٹلائزیشن، آئی ٹی انفراسٹرکچر، مصنوعی ذہانت، نوجوانوں کی تربیت اور ڈیجیٹل معیشت کے فروغ سے متعلق امور پر تبادلہ خیال کیا گیا۔
وزیراعظم شہباز شریف نے کہا کہ پاکستان میں حکومتی امور اور معیشت کی ڈیجیٹلائزیشن سمیت بڑے پیمانے پر ڈیجیٹل تبدیلی کا عمل جاری ہے۔ حکومت ’ڈیجیٹل نیشن پاکستان‘ کے وژن کے تحت قومی ڈیجیٹل ایکو سسٹم تشکیل دینے کے لیے متعدد اقدامات پر عملدرآمد کر رہی ہے، جو حتمی مراحل میں ہیں۔
وزیراعظم نے آئی ٹی انفراسٹرکچر کو جدید خطوط پر استوار کرنے کے حکومتی عزم کا اعادہ کرتے ہوئے نوجوانوں کو آئی ٹی اور مصنوعی ذہانت کی تربیت دینے کے جاری پروگراموں سے بھی وفد کو آگاہ کیا۔
شہباز شریف نے گوگل جیسی عالمی ٹیکنالوجی کمپنی کے ساتھ اشتراک عمل کی اہمیت پر زور دیتے ہوئے پاکستان میں دفتر کھولنے کے گوگل کے فیصلے کا خیرمقدم کیا۔ انہوں نے کہا کہ اس اقدام سے پاکستان اور گوگل کے درمیان شراکت داری مزید مستحکم ہوگی۔
وزیراعظم نے پاکستان کی ڈیجیٹل معیشت کو آگے بڑھانے میں گوگل کے کردار کو سراہتے ہوئے ان اقدامات کی بھی تعریف کی جن کے نتیجے میں ہزاروں پاکستانی نوجوانوں کو باعزت روزگار کے مواقع میسر آئے۔
انہوں نے کہا کہ پاکستانی نوجوانوں میں ڈیجیٹل شعبے میں بے پناہ صلاحیت موجود ہے اور امید ہے کہ گوگل نوجوانوں کی مہارتوں میں اضافے اور انہیں بااختیار بنانے کے لیے اپنی سرگرمیوں کو مزید وسعت دے گا۔
ولسن وائٹ نے وزیراعظم کو گوگل کے مستقبل کے منصوبوں سے آگاہ کیا اور کہا کہ پاکستان میں مقامی دفتر کا قیام ملک میں ڈیجیٹل تبدیلی کے عمل کو تیز کرنے کے گوگل کے عزم کو مزید تقویت دے گا۔
گوگل وفد کے مطابق مقامی دفتر موجودہ شراکت داری کو بنیاد بناتے ہوئے پاکستانی نوجوانوں کے لیے طویل مدتی مواقع پیدا کرنے اور مقامی کاروباروں کو عالمی سطح پر لے جانے میں مدد فراہم کرے گا۔
ولسن وائٹ نے مقامی شراکت داروں کے ساتھ گوگل کی جانب سے قائم کردہ کروم بکس اسمبلی لائن پر اطمینان کا اظہار کرتے ہوئے کہا کہ پاکستان میں اسمبل ہونے والی کروم بکس کو خطے کے دیگر ممالک میں برآمد کرنے کے وسیع امکانات موجود ہیں۔
انہوں نے کہا کہ گوگل پاکستان کی نوجوان آبادی کی بے پناہ صلاحیتوں کو تسلیم کرتا ہے اور آئی ٹی، مصنوعی ذہانت، گیمنگ سمیت دیگر شعبوں میں مہارت بڑھانے کے پروگراموں کو وسعت دینے کا خواہشمند ہے۔
ملاقات کے اختتام پر وزیراعظم شہباز شریف، ولسن وائٹ، ناظم الامور نٹالی بیکر اور دیگر شرکاء نے پاکستان میں گوگل کے دفتر کے افتتاح کے موقع پر مشترکہ طور پر یادگاری تختی کی نقاب کشائی بھی کی۔
