اسلام آباد(پاک ترک نیوز )صدرِ مملکت آصف علی زرداری نے سکیورٹی فورسز اور پولیس کی مشترکہ انٹیلی جنس بیسڈ کارروائیوں میں فتنہ الہندوستان اور فتنہ الخوارج کے 49 دہشت گردوں کی ہلاکت پر سکیورٹی اہلکاروں کو خراجِ تحسین پیش کیا ہے۔
صدر زرداری نے کہا کہ بیرونی پشت پناہی میں سرگرم دہشت گرد عناصر ملک کے امن و استحکام کو نقصان پہنچانے میں کبھی کامیاب نہیں ہوں گے۔
صدرِ مملکت کا کہنا تھا کہ دہشت گردی کے مکمل خاتمے تک دہشت گرد عناصر کے خلاف کارروائیاں بھرپور انداز میں جاری رہیں گی۔
انہوں نے کہا کہ وہ دن دور نہیں جب بلوچستان اور خیبر پختونخوا کے عوام دہشت گردی سے مکمل نجات حاصل کرکے امن، قومی ترقی اور خوشحالی کی منزل حاصل کریں گے۔
صدرِ مملکت نے دہشت گردی کے خلاف جنگ میں سکیورٹی فورسز اور پولیس کی قربانیوں اور پیشہ ورانہ صلاحیتوں کو بھی سراہا۔
