کراچی میں سحری کے وقت سلنڈر دھماکا، 16 افراد جاں بحق، بچی معجزانہ طور پر زندہ بچ گئی

کراچی: (پاک ترک نیوز)کراچی کے علاقے سولجر بازار گل رانا کالونی میں سحری کے وقت ایک رہائشی عمارت میں گیس لیکیج کے باعث خوفناک دھماکا ہوا، جس کے نتیجے میں جاں بحق افراد کی تعداد 16 تک پہنچ گئی ہے، جبکہ 14 زخمی مختلف ہسپتالوں میں زیرِ علاج ہیں۔
ریسکیو حکام کے مطابق متاثرہ عمارت تین منزلہ تھی اور ہر منزل پر ایک کمرہ قائم تھا۔ دھماکا اتنا شدید تھا کہ عمارت کی چھت گر گئی اور بڑا حصہ زمین بوس ہو گیا، جس کے باعث کئی افراد ملبے تلے دب گئے۔ تنگ گلیوں کی وجہ سے بھاری مشینری کو جائے وقوعہ تک پہنچانے میں شدید مشکلات کا سامنا کرنا پڑا، تاہم امدادی ٹیموں نے مسلسل کارروائی جاری رکھی۔
چیف آپریٹنگ افسر ریسکیو 1122، ڈاکٹر عابد جلال الدین نے بتایا کہ اب تک 16 افراد کی لاشیں نکالی جا چکی ہیں، جن میں ایک خاتون اور 10 سالہ بچی نازیہ بھی شامل ہے۔ یہ سانحہ پورے علاقے کو سوگ میں ڈبو گیا ہے۔
ریسکیو اہلکاروں نے ملبے سے ایک اور بچی کو معجزانہ طور پر زندہ نکال لیا، جسے فوری طبی امداد فراہم کی گئی۔ ڈی جی ریسکیو 1122 بریگیڈیئر واجد کے مطابق ابتدائی اطلاعات کے مطابق دھماکا پہلی منزل پر ہوا، اور ممکنہ طور پر اس کی وجہ گیس سلنڈر یا گیس کھینچنے والی مشین ہو سکتی ہے، تاہم اصل وجہ کا تعین تحقیقات کے بعد کیا جائے گا۔
امدادی کارروائیوں کے دوران خصوصی آلات کے ذریعے لوہے کے ڈھانچے کو کاٹ کر ملبہ ہٹایا جا رہا ہے تاکہ اگر کوئی زندہ فرد موجود ہو تو اسے محفوظ نکالا جا سکے۔ پولیس اور دیگر ادارے بھی موقع پر موجود ہیں، جبکہ سرچ اینڈ ریسکیو آپریشن ملبہ مکمل ہٹانے تک جاری رہے گا۔