دبئی : (پاک ترک نیوز)پاک بھارت جغرافیائی و سیاسی کشیدگی اب کرکٹ کے شیڈول پر بھی اثر انداز ہوتی دکھائی دے رہی ہے۔ برطانوی میڈیا رپورٹ کے مطابق انٹرنیشنل کرکٹ کونسل مستقبل کے بڑے ایونٹس آسٹریلیا منتقل کرنے پر غور کر رہی ہے۔
اطلاعات کے مطابق 2029 ءکی آئی سی سی چیمپئنز ٹرافی اور 2031 ءکا آئی سی سی مینز کرکٹ ورلڈ کپ، جو اس وقت بھارت کی میزبانی میں (اور ورلڈ کپ بنگلادیش کے ساتھ مشترکہ میزبانی میں) شیڈول ہیں، ممکنہ طور پر آسٹریلیامنتقل کیے جا سکتے ہیں۔
یہ پیش رفت جاری ٹی ٹونٹی ورلڈ کپ کے دوران پیدا ہونے والی غیر یقینی صورتحال کے تناظر میں سامنے آئی ہے۔
ابتدائی طور پر پاکستان نے سیکیورٹی خدشات اور بنگلہ دیش کی ٹورنامنٹ سے علیحدگی کے معاملے پر بھارت کے خلاف گروپ میچ کے بائیکاٹ کا اعلان کیا تھا۔
تاہم بعد ازاں اعلیٰ سطح مشاورت کے بعد یہ فیصلہ واپس لے لیا گیا۔ ذرائع کے مطابق اگر بائیکاٹ برقرار رہتا تو تقریباً 250 ملین ڈالر کا مالی نقصان ہو سکتا تھا۔
کرکٹ میں یہ تناؤ وسیع تر سیاسی کشیدگی کی عکاسی کرتا ہے۔ مئی 2025 ءمیں دونوں ممالک کے درمیان مختصر جنگ بھی ہوئی جس میں امریکہ نے ثالثی کا کردار ادا کیا۔
حالیہ ٹورنامنٹس، مثلاًایشیاءاور ٹی20 ورلڈ کپ میچز میں بھارتی کھلاڑیوں کی جانب سے روایتی بعد از میچ مصافحے سے گریز بھی خبروں میں رہا۔ دونوں ممالک کے درمیان باہمی سیریز 2012ء سے معطل ہے، اور نئی دہلی پاکستان کے دوروں کی اجازت نہیں دیتا۔
2024ء میںپاکستان کرکٹ بورڈ اور بھارت کے بورڈ نے چیمپئنز ٹرافی 2025 ءکے لیے “ہائبرڈ ماڈل” پر اتفاق کیا تھا، جس کے تحت میچز غیر جانبدار مقامات پر کھیلے گئے۔
اگر آئی سی سی واقعی میزبانی تبدیل کرتی ہے تو یہ عالمی کرکٹ میں ایک بڑا انتظامی اور مالی فیصلہ ہوگا، جس کے اثرات طویل مدت تک محسوس کیے جا سکتے ہیں۔
پاک بھارت کشیدگی کا اثر کرکٹ پر، آئی سی سی کا بڑے ایونٹس آسٹریلیا منتقل کرنے پر غور
