پاکستانی طالبعلم نے اردو اے آئی ماڈل متعارف کرا دیا

لاہور:(پاک ترک نیوز)پاکستان نے مصنوعی ذہانت کے میدان میں ایک تاریخی سنگِ میل عبور کرتے ہوئے دنیا کا سب سے بڑا اردو زبان پر مبنی لارج لینگویج ماڈل متعارف کرا دیا ہے۔
پاکستان کا اپنا اردو چیٹ جی پی ٹی، جسے ’’قلب‘‘ کا نام دیا گیا ہے، باضابطہ طور پر لانچ کر دیا گیا ہے۔ یہ جدید اے آئی ماڈل امریکا میں زیرِ تعلیم پاکستانی طالب علم تیمور حسن کی قیادت میں تیار کیا گیا ہے۔
’’قلب‘‘ کو خالصتاً اردو زبان کے لیے تیار کیا گیا ہے اور یہ اپنی نوعیت کا دنیا کا سب سے بڑا اردو لارج لینگویج ماڈل قرار دیا جا رہا ہے۔
اس ماڈل کو 1.97 ارب ٹوکنز پر مشتمل وسیع ڈیٹا سیٹ پر تربیت دی گئی ہے، جبکہ اسے سات سے زائد بین الاقوامی معیارِ جانچ کے فریم ورکس پر پرکھا گیا ہے۔
’’قلب‘‘ نے اردو زبان پر مبنی دیگر اے آئی ماڈلز کے مقابلے میں حقیقی دنیا کی کارکردگی کے اہم پیمانوں پر نمایاں برتری حاصل کی ہے۔
تیمور حسن ایک نوجوان سیریل انٹرپرینیور ہیں، جو اب تک 13 اسٹارٹ اپس کامیابی سے لانچ اور ایگزٹ کر چکے ہیں۔ وہ مائیکروسافٹ کپ کے سابق فاتح بھی رہ چکے ہیں اور مختلف عالمی فورمز پر پاکستان کی نمائندگی کر چکے ہیں۔
دنیا بھر میں 23 کروڑ سے زائد افراد اردو بولتے ہیں، اور ’’قلب‘‘ اس زبان میں جدید اے آئی سہولیات فراہم کر کے ایک طویل عرصے سے موجود تکنیکی خلا کو پُر کرنے کی صلاحیت رکھتا ہے۔
یہ ماڈل مقامی کاروبار، اسٹارٹ اپس، تعلیمی پلیٹ فارمز، ڈیجیٹل سروسز اور وائس بیسڈ اے آئی ایجنٹس کے لیے استعمال کیا جا سکے گا، جس سے جدت کے نئے مواقع پیدا ہوں گے۔
پاکستان کا اپنا اردو چیٹ جی پی ٹی ’’قلب‘‘ متعارف ہونا ملک کو خطے میں مصنوعی ذہانت کی دوڑ میں نمایاں مقام پر لےآیا ہے اور اردو زبان میں ڈیجیٹل تجربات کے ایک نئے دور کا آغاز ہے۔