ہری پور( پاک ترک نیوز) ڈیم کے پانچویں توسیعی پن بجلی منصوبے (ٹی فائیو) میں چٹان کا بڑا حصہ گرنے سے پیدا ہونے والے شگاف کو بند کرنے کے لیے تعمیراتی کام تیزی سے جاری ہے۔ انجینئرز، کنٹریکٹرز اور واپڈا کی ٹیمیں دن رات کام میں مصروف ہیں تاکہ منصوبے کو مقررہ شیڈول کے مطابق مکمل کیا جاسکے۔منصوبے کے انٹیک پٹ ایریا میں پیر کی صبح دوسرے بینچ کنیکٹنگ ٹنل کی کھدائی کے دوران کمزور چٹان کا ایک حصہ اچانک گر گیا تھا، جس کے نتیجے میں انٹیک پٹ کا پانی سرنگ اور زیر تعمیر پاور ہاؤس میں داخل ہوگیا۔واقعے کے فوری بعد تمام کارکنوں کو بحفاظت باہر نکال لیا گیا، جبکہ انٹیک پٹ سے پانی مکمل طور پر نکال دیا گیا ہے اور مزید پانی کام کی جگہوں میں داخل نہیں ہو رہا۔حکام کے مطابق چٹان گرنے کے واقعے سے مرکزی سرنگ، زیر تعمیر پاور ہاؤس، ٹیل ریس کلورٹ اور سوئچ یارڈ کو کوئی نقصان نہیں پہنچا۔ شگاف بند کرنے کے لیے کنکریٹ ڈالنے کا کام جاری ہے، جبکہ پاور ہاؤس سے پانی نکالنے کے لیے ہیوی ڈیوٹی پمپنگ مشینیں استعمال کی جارہی ہیں۔
یہ بھی پڑھیں: الیکشن کمیشن کا 42 کنٹونمنٹ بورڈز میں انتخابات سے متعلق کیس کا تحریری حکم نامہ جاری
منصوبے کے ذرائع کا کہنا ہے کہ شگاف کو کنکریٹ سے بھرنے اور پاور ہاؤس کو مکمل خشک کرنے کا کام ایک ہفتے میں مکمل ہونے کا امکان ہے، جس کے بعد تعمیراتی سرگرمیاں معمول پر آسکیں گی۔واقعے کی وجوہات اور ممکنہ نقصانات کا جائزہ لینے کے لیے ماہرین ارضیات، زلزلہ پیما شعبے، کنٹریکٹرز، کنسلٹنٹس اور واپڈا حکام کی ٹیمیں ہر چھ گھنٹے بعد رپورٹ مرتب کررہی ہیں۔ ابتدائی رپورٹ چیئرمین واپڈا اور وزارت آبی وسائل کو بھجوا دی گئی ہے، جبکہ حتمی رپورٹ وزیراعظم آفس اور متعلقہ اداروں کو پیش کیے جانے کا امکان ہے۔دوسری جانب تربیلا توسیعی منصوبوں کے عوامی لیبر یونین کے جنرل سیکریٹری کے مطابق ٹی فائیو منصوبے پر کام کرنے والے تقریباً تین ہزار مزدوروں میں سے بیشتر کو اگلے احکامات تک گھروں میں رہنے کی ہدایت کی گئی ہے، جبکہ فی الحال صرف ڈمپر اور کرین آپریٹرز کو کام پر بلایا گیا ہے۔
