اسلام آباد (پاک ترک نیوز )وفاقی وزیر پیٹرولیم علی پرویز ملک نے پیٹرولیم مصنوعات کی قیمتوں میں مزید کمی کا عندیہ دیتے ہوئے کہا ہے کہ آج بھی عوام کے لیے اچھی خبر آئے گی، عالمی منڈی میں تیل کی قیمتوں میں کمی کا فائدہ عوام تک پہنچایا جائے گا۔
وزیر اطلاعات عطاء اللہ تارڑ اور وفاقی وزیر پیٹرولیم علی پرویز ملک نے مشترکہ پریس کانفرنس کرتے ہوئے کہا کہ عالمی منڈی میں تیل کی قیمتیں کم ہوئی ہیں، جس کے اثرات عوام کو ریلیف کی صورت میں منتقل کیے جائیں گے۔
علی پرویز ملک کا کہنا تھا کہ خطے کی صورت حال کے باعث پوری دنیا مشکل وقت سے گزر رہی ہے، تاہم وزیراعظم کی ہدایات واضح ہیں کہ کمزور طبقے کو زیادہ سے زیادہ سہولت فراہم کی جائے۔ گزشتہ جمعے کو ریفائنریوں کے تعاون سے پیٹرول کی قیمت میں اضافے کو روکا گیا، اب عالمی منڈی میں قیمتوں میں کمی کا فائدہ بھی عوام تک پہنچایا جائے گا۔
وفاقی وزیر نے کہا کہ حکومت معاشی صورت حال کو مدنظر رکھتے ہوئے عوام کو ہر ممکن ریلیف فراہم کرنے کے اقدامات کر رہی ہے۔ ملک میں ایک کروڑ گیس کنکشنز ہیں، جہاں پائپ لائن کے ذریعے گیس دستیاب نہیں وہاں شہری ایل پی جی استعمال کرتے ہیں۔ عوام کو ریلیف دینے کے لیے 130 ارب روپے کی سبسڈی فراہم کی گئی ہے۔
