اسلام آباد ( پاک ترک نیوز) : حکومت اور پاکستان تحریک انصاف کے درمیان سیاسی کشیدگی کم کرنے اور چار اکتوبر کے مجوزہ لانگ مارچ کے معاملے پر مذاکرات شروع ہوگئے ہیں۔ مذاکرات قومی اسمبلی کے اسپیکر سردار ایاز صادق کی میزبانی میں ہورہے ہیں۔ حکومتی وفد کی جانب سے تحریک انصاف سے لانگ مارچ ملتوی کرنے کی درخواست کیے جانے کی اطلاعات ہیں، جبکہ تحریک انصاف کی جانب سے بانی پی ٹی آئی سے متعلق اپنے مطالبات اور عدالتی فیصلوں پر عمل درآمد پر زور دیا جا رہا ہے۔ تحریک انصاف نے حکومت کی مذاکرات کی دعوت قبول کی تھی۔
یہ بھی پڑھیں: ایمرجنسی یا گورنر راج مسائل کا حل نہیں، راجہ ناصر عباس
مذاکرات میں حکومت اور پیپلز پارٹی کی جانب سے وزیر داخلہ محسن نقوی، وزیراعظم کے مشیر برائے سیاسی امور رانا ثناء اللہ، وفاقی وزیر امیر مقام، سینیٹر شیری رحمان، نوید قمر اور اعجاز جاکھرانی شریک ہیں۔ اپوزیشن کی جانب سے راجہ ناصر عباس، بیرسٹر گوہر علی خان، اسد قیصر، سلمان اکرم راجا، عامر ڈوگر اور حلیم عادل شیخ سمیت رہنما مذاکرات میں شریک ہیں۔ مذاکرات سے قبل حکومتی اتحاد کی جانب سے سیاسی معاملات کو بات چیت کے ذریعے حل کرنے کا فیصلہ کیا گیا۔ حکومت اور اتحادی جماعتوں کے درمیان مشاورت میں خیبر پختونخوا کی صورتحال اور تحریک انصاف کے مجوزہ لانگ مارچ پر بھی غور کیا گیا۔
تحریک انصاف نے مؤقف اختیار کیا ہے کہ لانگ مارچ پر بات چیت کے ساتھ بانی پی ٹی آئی سے ملاقات، ان سے متعلق عدالتی فیصلوں پر عمل درآمد اور دیگر سیاسی مطالبات بھی مذاکرات کا حصہ ہوں گے۔ تحریک انصاف کے رہنماؤں نے گورنر راج یا ایمرجنسی کے نفاذ کی مخالفت بھی کی ہے۔
