اسلام آباد ( پاک ترک نیوز) تحریک تحفظ آئین پاکستان کے سربراہ راجہ ناصر عباس نے کہا ہے کہ ملک کے مسائل کا حل ایمرجنسی یا گورنر راج نہیں، بلکہ سیاسی جماعتوں کو مل بیٹھ کر پاکستان کو درپیش مسائل پر بات چیت کرنی چاہیے۔اسلام آباد میں جماعت اسلامی کے وفد سے ملاقات کے بعد میڈیا سے گفتگو کرتے ہوئے راجہ ناصر عباس نے کہا کہ پاکستان کا نظام ناکام ہوچکا ہے، جو لوگ ملک سے محبت کرتے ہیں وہ موجودہ صورتحال پر خاموش نہیں رہ سکتے۔
انہوں نے کہا کہ پاکستان کو سیاسی اور معاشی بحران سے نکالنے کی ضرورت ہے، اس کے لیے سیاسی قوتوں کو اپنا کردار ادا کرنا ہوگا۔راجہ ناصر عباس نے تحریک تحفظ آئین پاکستان کی جانب سے جماعت اسلامی کو آل پارٹیز کانفرنس میں شرکت کی دعوت بھی دی، جس پر جماعت اسلامی نے شرکت پر آمادگی ظاہر کردی۔اس موقع پر امیر جماعت اسلامی حافظ نعیم الرحمن نے کہا کہ جماعت اسلامی گورنر راج یا ایمرجنسی کی کبھی حمایت نہیں کرے گی۔ انہوں نے کہا کہ سیاسی معاملات کے حل کے لیے ہونے والی بات چیت کو کسی نتیجے تک پہنچنا چاہیے۔
حافظ نعیم الرحمن نے کہا کہ تحریک انصاف کے مطالبات جائز ہیں اور حکومت نے مذاکرات کی طرف آنے میں بہت تاخیر کی ہے۔امیر جماعت اسلامی نے کہا کہ تحریک انصاف کے رہنماؤں کو بانی پی ٹی آئی سے ملاقات کی اجازت ملنی چاہیے اور جیل میں ان کی صحت کا بھی خیال رکھا جانا چاہیے۔انہوں نے کہا کہ سپریم کورٹ کے فیصلے پر من و عن عمل ہونا چاہیے، جبکہ بانی پی ٹی آئی کی بہنوں سمیت گرفتار خواتین کو بھی رہا کیا جانا چاہیے۔
یہ بھی پڑھیں: بات چیت میں کبھی جھجک محسوس کی نہ انا آڑے آئی، طلال چودھری
حافظ نعیم الرحمن کا کہنا تھا کہ یہ سب کا پاکستان ہے، کسی ایک ادارے یا بیوروکریسی کا نہیں۔ انہوں نے واضح کیا کہ جماعت اسلامی آل پارٹیز کانفرنس میں شرکت کرے گی۔
