اسلام آباد(پاک ترک نیوز) وزیراعظم شہباز شریف نے زرِ مبادلہ کے ذخائر تاریخ کی بلند ترین سطح 21 ارب 40 کروڑ ڈالر تک پہنچنے پر اظہارِ تشکر کیا ہے۔وزیراعظم شہباز شریف نے زرِ مبادلہ کے ذخائر میں اضافے کو معاشی استحکام کی جانب ایک اور تاریخی سنگِ میل قرار دیا۔وزیراعظم نے کہا کہ زرِ مبادلہ کے ذخائر 21 ارب 40 کروڑ ڈالر تک پہنچنا معاشی ٹیم کی دن رات محنت اور درست سمت میں اٹھائے گئے اقدامات کا ثبوت ہے۔انہوں نے کہا کہ بین الاقوامی سرمایہ کاری منڈیوں تک کامیاب رسائی ملکی معیشت پر عالمی اعتماد کی بحالی کا مظہر ہے۔
یہ بھی پڑھیں: ایران جنگ پر بڑا فیصلہ کرنے والا ہوں،ڈونلڈ ٹرمپ
شہباز شریف کا کہنا تھا کہ زرِ مبادلہ کے ذخائر میں اضافہ ملکی بیرونی ادائیگیوں کی صلاحیت کو مزید مضبوط بنائے گا اور عالمی معاشی مشکلات کا مقابلہ کرنے کی استعداد بھی بڑھے گی۔وزیراعظم نے کہا کہ مستحکم معاشی پوزیشن سے سرمایہ کاری اور پائیدار معاشی ترقی کے نئے مواقع پیدا ہوں گے۔شہباز شریف نے وفاقی وزیر خزانہ محمد اورنگزیب، گورنر اسٹیٹ بینک، معاشی ٹیم اور بیرون ملک مقیم پاکستانیوں کو خراجِ تحسین بھی پیش کیا۔
