کراچی(پاک ترک نیوز ) پاکستان کے زرمبادلہ ذخائر میں ایک ہفتے کے دوران بڑا اضافہ ریکارڈ کیا گیا ہے، جس کے بعد ملکی زرمبادلہ ذخائر 26 ارب 79 کروڑ ڈالر سے تجاوز کر گئے۔
اسٹیٹ بینک کے مطابق ایک ہفتے کے دوران مرکزی بینک کے ذخائر میں 3 ارب 6 کروڑ ڈالر کا اضافہ ہوا، جس کے بعد اسٹیٹ بینک کے زرمبادلہ ذخائر 21 ارب 38 کروڑ 90 لاکھ ڈالر کی سطح پر پہنچ گئے۔
اعداد و شمار کے مطابق کمرشل بینکوں کے ذخائر 5 ارب 40 کروڑ 22 لاکھ ڈالر ہوگئے ہیں۔
اسٹیٹ بینک کے مطابق زرمبادلہ ذخائر میں نمایاں اضافے کی بڑی وجہ یورو بانڈ کی رقم موصول ہونا ہے، جس کے باعث ملکی ذخائر میں ایک ہفتے کے دوران نمایاں بہتری آئی ہے۔
