لاہور( پاک ترک نیوز) لاہور میں تین روزہ پاکستان انٹرنیشنل آٹو شو 2026 کا باقاعدہ آغاز ہوگیا، وزیراعلیٰ پنجاب مریم نواز شریف نے ایکسپو سینٹر پہنچ کر آٹو شو کا افتتاح کیا۔وزیراعلیٰ مریم نواز شریف نے آٹو موبائل صنعت سے وابستہ صنعتکاروں اور ماہرین سے ملاقات کی اور قومی معاشی ترقی میں ان کی خدمات کو سراہا۔الیکٹرک گاڑیوں کی صنعت سے وابستہ نمائندوں اور انتظامی افسران نے گرین ٹیکسی اور وزیراعلیٰ بائیک اسکیم کو سراہتے ہوئے انہیں شاندار اقدامات قرار دیا۔
ٹریکٹر ساز صنعت کے نمائندوں نے بھی گرین ٹریکٹر اسکیم کے اجرا کو سراہا۔ ان کا کہنا تھا کہ گرین ٹریکٹر اسکیم سے مقامی ٹریکٹر سازی کو فروغ ملا اور صنعت کو اپنے پاؤں پر کھڑا ہونے میں مدد ملی۔وزیراعلیٰ مریم نواز شریف نے آٹو شو میں مختلف اسٹالز کا دورہ کیا، جدید گاڑیوں، موٹر سائیکلوں، برقی گاڑیوں، ایمبولینس، جنریٹرز اور مقامی آٹو پارٹس کا جائزہ لیا۔مریم نواز شریف نے برقی ایمبولینس میں خصوصی دلچسپی کا اظہار کیا جبکہ سوزوکی کے بائیو گیس ماڈل کا بھی معائنہ کیا۔ ہونڈا، سوزوکی اور دیگر کمپنیوں کے اسٹالز پر غیر ملکی ماہرین سے ملاقات کرکے مصنوعات کے بارے میں معلومات حاصل کیں۔
یہ بھی پڑھیں: میر رضا کی بینک ٹرانزیکشن ،سندھ ہائیکورٹ نے اسٹیٹ بینک سے جواب طلب کر لیا
وزیراعلیٰ نے پاکستان میں تیار ہونے والی مصنوعات کے معیار کو سراہتے ہوئے کہا کہ پاکستان کی گاڑیوں کی صنعت صنعتی ترقی، سرمایہ کاری اور روزگار کا اہم ذریعہ ہے۔مریم نواز شریف کا کہنا تھا کہ پنجاب حکومت مقامی پیداوار، سرمایہ کاری، ٹیکنالوجی اور جدت کے فروغ کے لیے پرعزم ہے، جبکہ پاکستان انٹرنیشنل آٹو شو کاروباری روابط، سرمایہ کاری اور ٹیکنالوجی کی منتقلی کے لیے مؤثر ثابت ہوگا۔ایکسپو سینٹر کے چار ہالز میں جاری آٹو شو میں ملکی و غیر ملکی کمپنیوں کی بھرپور شرکت ہے۔ نمائش میں ایک سو پچاس نمائش کنندگان شریک ہیں، جن میں چوالیس بین الاقوامی اور تینتالیس مقامی نمائش کنندگان شامل ہیں۔آٹو شو میں سوزوکی، کیا، جی اے سی، چیری، سازگار، بی وائی ڈی، جی ٹور، ہونڈائی اور ہونڈا سمیت مختلف نمایاں گاڑی ساز کمپنیوں کے اسٹالز لگائے گئے ہیں، جہاں گاڑیاں، موٹر سائیکلیں، برقی اور نیم برقی گاڑیاں اور مقامی آٹو پارٹس نمائش کے لیے پیش کیے گئے ہیں۔
