ریاض(پاک ترک نیوز) سعودی ایوی ایشن گروپ اور پاکستان انٹرنیشنل ایئرلائنز کے درمیان فضائی شعبے میں تعاون کے نئے مواقع تلاش کرنے کے لیے اہم ملاقات ہوئی۔
سعودیہ گروپ کے ڈائریکٹر جنرل انجینئر ابراہیم العمر نے پی آئی اے کے وفد سے ملاقات کی، جس میں ہوا بازی کے شعبے میں پیش رفت اور اسٹریٹجک منصوبوں پر تبادلہ خیال کیا گیا۔
ملاقات سعودی۔پاکستان مشترکہ بزنس کونسل کے تعاون سے ہوئی، جس کی سربراہی شہزادہ منصور بن محمد آل سعود کر رہے ہیں۔پی آئی اے کے وفد نے سعودیہ گروپ کے مختلف ذیلی اداروں کا دورہ بھی کیا اور دیکھ بھال، مرمت اور تربیت کے مربوط نظام کا جائزہ لیا۔
سعودیہ گروپ کے مطابق یہ شعبے سعودی ماہرین کی صلاحیتوں کو فروغ دینے، ملکی ایوی ایشن انڈسٹری کی مسابقتی حیثیت بہتر بنانے اور سعودی وژن 2030 کے اہداف کے حصول میں اہم کردار ادا کر رہے ہیں۔
دوسری جانب سعودیہ ایئرلائن نے جولائی 2026 میں وقت کی پابندی کے حوالے سے دنیا کی بہترین کارکردگی دکھانے والی ایئرلائن کا اعزاز حاصل کرلیا۔
عالمی ایوی ایشن اینالیٹکس فرم سیریم کی ماہانہ رپورٹ کے مطابق سعودیہ نے جولائی میں 87.24 فیصد پروازیں مقررہ وقت پر منزل تک پہنچائیں۔
سعودیہ نے جولائی کے دوران مجموعی طور پر 16 ہزار 406 پروازیں چلائیں اور وقت کی پابندی میں دنیا بھر کی ایئرلائنز کو پیچھے چھوڑ دیا۔
یہ بھی پڑھیں: دبئی میں پی آئی اے کی پرواز میں ہنگامہ، مشتعل مسافر گرفتار
ایئرلائن کے مطابق یہ کارکردگی موسم گرما کے مصروف سفری سیزن کے دوران سامنے آئی، جب مسافروں کی تعداد میں اضافے کے باعث فضائی کمپنیوں کو آپریشنل چیلنجز کا سامنا تھا۔
