اسلام آباد (پاک ترک نیوز ) وزیر مملکت داخلہ طلال چودھری نے راولپنڈی مال روڈ پر پیش آنے والے فائرنگ کے واقعے کو پی ٹی آئی کی مبینہ نفرت اور انتشار کی سیاست کا نتیجہ قرار دے دیا۔
طلال چوہدری نے نیوز کانفرنس میں کہا کہ سیاسی کارکن کی تربیت کس نے کی اور اسے نظریہ کس نے دیا؟ پی ٹی آئی سے بارہا کہا گیا کہ نفرت اور انتشار کی سیاست نہ کریں۔
وزیر مملکت داخلہ کے مطابق ایسے واقعات 9 مئی سے شروع ہوئے، اگر کارکن کی ذہنی حالت درست نہیں تھی تو اس نے خود کو نقصان کیوں نہیں پہنچایا؟ اپنے گھر والوں پر حملہ کیوں نہیں کیا؟
انہوں نے کہا کہ پی ٹی آئی قیادت واقعے کو محض ایک کارکن کا انفرادی عمل قرار دے کر بری الذمہ نہیں ہوسکتی۔
طلال چوہدری کے مطابق سیاسی کارکن نے سیکیورٹی اہلکاروں کی جان لینے کی کوشش کی، جس پر سیکیورٹی فورسز نے اپنے دفاع میں فائرنگ کی۔
واقعے کے حوالے سے دستیاب رپورٹس کے مطابق راولپنڈی مال روڈ پر فائرنگ کرنے والے شخص کی شناخت محمد حسین کے نام سے ہوئی، جبکہ پی ٹی آئی رہنما شفیع جان نے بھی اس کے پی ٹی آئی کارکن ہونے کی تصدیق کی ہے، تاہم انہوں نے واقعے کو پارٹی سے جوڑنے کی مخالفت اور مکمل تحقیقات کا مطالبہ کیا۔
طلال چوہدری کا کہنا تھا کہ واقعے کے تمام پہلوؤں کی تحقیقات ضروری ہیں اور سیاسی قیادت کو اپنے کارکنوں کے طرزِ عمل کی ذمہ داری سے فرار نہیں ہونا چاہیے۔
