کراچی ( پاک ترک نیوز) کراچی میں پیٹرولیم ڈیلرز ایسوسی ایشن نے حکومت کو مطالبات کی منظوری کے لیے 72 گھنٹے کا الٹی میٹم دے دیا۔
چیئرمین پیٹرولیم ڈیلرز ایسوسی ایشن ملک خدا بخش کے مطابق مطالبات تسلیم نہ کیے گئے تو 15 اگست صبح 6 بجے سے ملک بھر میں پیٹرول پمپس غیر معینہ مدت کے لیے بند کردیے جائیں گے۔
ملک خدا بخش نے کہا کہ مطالبات کی منظوری تک پیٹرول پمپس دوبارہ نہیں کھولے جائیں گے، جبکہ ہڑتال مطالبات پورے ہونے تک جاری رہے گی۔
انہوں نے بتایا کہ ملک بھر کے پیٹرولیم ڈیلرز کے اجلاس میں ہڑتال کا فیصلہ کیا گیا، جس میں مختلف علاقوں سے ڈیلرز نے شرکت کی۔
پیٹرولیم ڈیلرز نے حکومت سے پیٹرول پر اپنا مارجن 8 فیصد کرنے کا مطالبہ بھی کردیا ہے۔
یہ بھی پڑھیں: پیٹرولیم مصنوعات کی قیمتیں ایک روز کے لیے برقرار
ملک خدا بخش کا کہنا تھا کہ ’’ہمارا صبر کا پیمانہ لبریز ہوچکا ہے‘‘، جبکہ 14 ہزار ممبرز کا دباؤ ہے کہ حکومت فوری طور پر مطالبات تسلیم کرے۔
چیئرمین پیٹرولیم ڈیلرز ایسوسی ایشن نے واضح کیا کہ 15 اگست صبح 6 بجے سے ملک بھر کے پیٹرول پمپس پر کاروبار بند کردیا جائے گا اور مطالبات کی منظوری تک ہڑتال ختم نہیں کی جائے گی۔
