دبئی (پاک ترک نیوز ) دبئی سے اسلام آباد آنے والی پاکستان انٹرنیشنل ایئرلائنز کی پرواز پی کے 212 آپریشنل تاخیر کے باعث کئی گھنٹے رکی رہی، چند مسافروں نے ہنگامہ آرائی کرتے ہوئے کاک پٹ میں زبردستی داخل ہونے کی کوشش کی، جس پر دبئی سکیورٹی حکام نے کارروائی کرتے ہوئے مشتعل مسافروں کو حراست میں لے لیا۔
ذرائع کے مطابق گزشتہ رات دبئی سے اسلام آباد جانے والی پرواز پی کے 212 خطے کی سیکیورٹی صورتحال کے باعث تاخیر کا شکار ہوئی۔ دبئی ایئرپورٹ حکام نے حفاظتی اقدامات کے تحت تمام پروازوں کی روانگی کے درمیان 10،10 منٹ کا وقفہ مقرر کیا، جس کی وجہ سے پی آئی اے کا طیارہ روانگی کے لیے تیار ہونے کے باوجود تقریباً ساڑھے تین گھنٹے تک رن وے پر انتظار کرتا رہا۔
انتظار کے دوران مسافروں کو طیارے کے اندر ہی کھانا فراہم کیا گیا، تاہم کھانے کے بعد چند مسافروں نے بد نظمی شروع کر دی اور کاک پٹ میں زبردستی داخل ہونے کی کوشش کی۔ذرائع کا کہنا ہے کہ طیارے کے عملے نے بروقت کارروائی کرتے ہوئے کاک پٹ میں داخل ہونے کی کوشش ناکام بنا دی، تاہم ایک مشتعل مسافر نے طیارے کی کھڑکی بھی توڑ دی۔
واقعے کے بعد دبئی سیکیورٹی حکام کو فوری طور پر اطلاع دی گئی، جنہوں نے طیارے کا دروازہ کھلوا کر ہنگامہ آرائی کرنے والے تمام مسافروں کو حراست میں لے لیا۔
واقعے کے بعد طیارے کو گراؤنڈ کر دیا گیا، جبکہ دیگر مسافروں اور عملے کو ہوٹل منتقل کر دیا گیا۔ پی آئی اے کے مطابق پرواز اب آج رات 11:15 بجے دبئی سے اسلام آباد کے لیے روانہ کی جائے گی۔
