لاہور( پاک ترک نیوز) پرائیویٹ اسکولز سلوشنز آف پاکستان نے حکومت سے مطالبہ کیا ہے کہ نجی تعلیمی اداروں کو 3 اگست سے دوبارہ کھولنے کی اجازت دی جائے تاکہ طلبہ کی تعلیم کا مزید نقصان نہ ہو۔
یہ مطالبہ تنظیم کے صدر ملک عبدالصمد کی زیر صدارت ہونے والے اجلاس میں کیا گیا، جس میں نجی اسکولوں کو درپیش مسائل، حکومتی پابندیوں اور ان کے ممکنہ حل پر تفصیلی غور کیا گیا۔
اجلاس سے خطاب کرتے ہوئے ملک عبدالصمد نے تمام غیر رجسٹرڈ نجی اسکولوں پر زور دیا کہ وہ فوری طور پر اپنی رجسٹریشن مکمل کریں۔ ان کا کہنا تھا کہ رجسٹرڈ ادارے حکومتی قوانین کی پابندی کرتے ہوئے بغیر قانونی رکاوٹوں کے تعلیمی خدمات جاری رکھ سکیں گے۔
یہ بھی پڑھیں: لاہور کے قریب بڑے صنعتی زون کے لیے 6 بینکوں سے مالی معاونت حاصل، منصوبہ تعمیراتی مرحلے میں داخل
اجلاس کے شرکاء نے اس عزم کا اعادہ کیا کہ وہ نجی تعلیمی اداروں کو درپیش مسائل کے حل کے لیے متعلقہ حکام کے ساتھ تعاون جاری رکھیں گے اور ملک بھر میں معیاری تعلیم کے فروغ کے لیے اپنا کردار ادا کرتے رہیں گے۔
اجلاس میں سینئر نائب صدر امتیاز شوکت، صوبائی صدر سعید خان، حافظ فاروق خان، جنرل سیکریٹری توحید احمد، رفیق خلیل، وحید شاہ، اظہر خان، ملک سرور، طالب حسین اور دیگر عہدیداران نے بھی شرکت کی۔
