اسلام آباد ( پاک ترک نیوز) ہائر ایجوکیشن کمیشن پاکستان نے پاکستانی اور آزاد کشمیر کے طلبہ کے لیے بیرونِ ملک اعلیٰ تعلیم کے لیے اسکالرشپس کا اعلان کردیا۔
ایچ ای سی کے مطابق اوورسیز اسکالرشپس برائے ایم ایس، ایم فل اور پی ایچ ڈی، فیز تھری، بیچ فور کے تحت کامیاب امیدواروں کو دنیا کی ٹاپ 200 جامعات میں تعلیم کے مواقع فراہم کیے جائیں گے۔
اسکالرشپس کے لیے درخواستیں جمع کرانے کی آخری تاریخ 28 اگست 2026، شام 4 بجے مقرر کی گئی ہے۔
اسکالرشپس صرف مخصوص شعبوں میں دی جائیں گی، جن میں ڈیجیٹل ٹرانسفارمیشن اور جدید ٹیکنالوجیز، توانائی، موسمیاتی تبدیلی و ماحولیات، زراعت و غذائی تحفظ، صحت، بائیوٹیکنالوجی و لائف سائنسز، انجینئرنگ و جدید مینوفیکچرنگ، نیچرل و فزیکل سائنسز، سوشل سائنسز، بزنس و گورننس سمیت بین الشعبہ جاتی اور اسٹریٹجک شعبے شامل ہیں۔
پی ایچ ڈی اسکالرشپ کے لیے امیدوار کا پاکستانی یا آزاد کشمیر کا شہری ہونا ضروری ہے۔
17 سالہ غیر ملکی ایم ایس یا ایم ایس سی ڈگری رکھنے والے امیدوار بھی ایچ ای سی سے مساوات کی منظوری حاصل کرنے کی صورت میں اہل ہوسکتے ہیں۔
امیدوار کے ایم ایس، ایم فل یا مساوی ڈگری میں 4 میں سے کم از کم 3 سی جی پی اے یا سالانہ نظام میں فرسٹ ڈویژن ہونا ضروری ہے۔
تعلیمی کیریئر میں ٹرمینل ڈگری سے پہلے زیادہ سے زیادہ ایک سیکنڈ ڈویژن قابل قبول ہوگی۔
سرکاری جامعات، کالجز، تحقیقاتی و ترقیاتی اداروں، سرکاری اور نیم سرکاری اداروں کے ملازمین کے لیے زیادہ سے زیادہ عمر 40 سال جبکہ دیگر امیدواروں کے لیے عمر کی حد 35 سال مقرر کی گئی ہے۔
ایم ایس اسکالرشپ کے لیے امیدوار کا پاکستانی یا آزاد کشمیر کا شہری ہونا ضروری ہے۔
امیدوار کے پاس متعلقہ شعبے میں 16 سالہ تعلیم، مثلاً بی ایس، بی ای، ماسٹرز یا مساوی ڈگری ہونی چاہیے۔امیدوار کے پاس کم از کم 3.0 سی جی پی اے یا سالانہ نظام میں فرسٹ ڈویژن ہونا ضروری ہے۔
تعلیمی کیریئر میں زیادہ سے زیادہ ایک سیکنڈ ڈویژن قابل قبول ہوگی۔
سرکاری، نیم سرکاری، پبلک سیکٹر اور تحقیقاتی اداروں کے اہل ملازمین کے لیے عمر کی زیادہ سے زیادہ حد 35 سال جبکہ دیگر امیدواروں کے لیے 30 سال مقرر ہے۔
ایچ ای سی کے مطابق امیدواروں کا انتخاب میرٹ، ایچ ای سی اپٹی ٹیوڈ ٹیسٹ (HAT) کے نمبرز اور انٹرویو کی بنیاد پر کیا جائے گا۔
اس کے علاوہ حکومت پاکستان کے منظور شدہ صوبائی کوٹے بھی لاگو ہوں گے۔
درخواست دیتے وقت امیدواروں کو اپنی پسند کی غیر ملکی یونیورسٹی یا ملک کا انتخاب کرنا ہوگا، تاہم منتخب یونیورسٹی کا کیو ایس یا ٹائمز ہائر ایجوکیشن کی عالمی درجہ بندی میں ٹاپ 200 میں شامل ہونا ضروری ہے۔
ایچ ای سی کو یونیورسٹی یا ملک کی دوبارہ تخصیص کا اختیار بھی حاصل ہوگا۔
یہ بھی پڑھیں: حج2027پیکیجز کی قیمت مقرر،ریگولر حج لاگت 12لاکھ،ڈیجیٹل ادائیگیاں
امیدوار ایچ ای سی کے ای سروسز پورٹل کے ذریعے آن لائن درخواست جمع کراسکتے ہیں۔
درخواست کی پروسیسنگ فیس 3 ہزار روپے مقرر کی گئی ہے، جو ون لنک پیمنٹ سروس کے ذریعے ادا کرنا ہوگی۔
درخواست کی آخری تاریخ 28 اگست 2026 شام 4 بجے ہے۔اس مرحلے پر امیدواروں کو درخواست کی ہارڈ یا پرنٹ شدہ کاپی جمع کرانے کی ضرورت نہیں۔
صرف شارٹ لسٹ ہونے والے امیدواروں سے بعد میں دستخط شدہ درخواست اور مطلوبہ دستاویزات کی پرنٹ شدہ کاپی طلب کی جائے گی۔
