مظفرآباد(پاک ترک نیوز) آزاد کشمیر قانون ساز اسمبلی نے حالیہ کشیدہ صورتحال پر مشترکہ قرارداد منظور کرتے ہوئے مطالبہ کیا ہے کہ امن و امان خراب کرنے والوں کے خلاف بلاامتیاز کارروائی کی جائے، انٹرنیٹ سروس فوری طور پر بحال کی جائے اور حقائق سامنے لانے کے لیے ٹروتھ اینڈ ری کنسلی ایشن کمیشن قائم کیا جائے۔
قرارداد میں شہید پولیس اور سکیورٹی اہلکاروں کو خراجِ عقیدت پیش کرتے ہوئے ہر قسم کے تشدد، انتشار اور قانون شکنی کو مسترد کیا گیا۔ ایوان نے واضح کیا کہ شہریوں کے جان و مال کے تحفظ پر کوئی سمجھوتہ نہیں کیا جائے گا اور ہر صورت عوام کی جان و مال کی حفاظت یقینی بنائی جائے گی۔
قرارداد کے متن میں آزاد کشمیر حکومت سے مطالبہ کیا گیا کہ وہ فوری اقدامات کرتے ہوئے علاقے میں حالات معمول پر لائے اور عوام کو درپیش مشکلات کا ازالہ کرے۔
یہ بھی پڑھیں: پاکستان کا امریکا اور ایران سے مذاکرات پر زور
ایوان نے حقائق جاننے اور حالیہ واقعات کی شفاف تحقیقات کے لیے ٹروتھ اینڈ ری کنسلی ایشن کمیشن کے قیام کا بھی مطالبہ کیا، جبکہ مظاہرین سے اپیل کی گئی کہ کمیشن کی حتمی رپورٹ آنے تک اپنا احتجاج ختم کریں تاکہ علاقے میں امن اور معمولاتِ زندگی بحال ہو سکیں۔
