لاہور( پاک ترک نیوز) پنجاب حکومت نے صوبے بھر کے تمام اسکولوں میں اکتوبر سے دسمبر تک میگا اسپورٹس ایونٹس کرانے کا فیصلہ کرلیا، جس کا مقصد طلبہ میں کھیلوں کو فروغ دینے کے ساتھ ساتھ نئے ٹیلنٹ کی تلاش ہے۔صوبائی وزیر تعلیم رانا سکندر حیات کی زیر صدارت محکمہ تعلیم کے اجلاس میں اسپورٹس ایکشن پلان کا جائزہ لیا گیا، جس میں وزیر تعلیم نے منصوبے کی منظوری دی۔
حکام نے اجلاس کو بریفنگ میں بتایا کہ پنجاب کے تمام 35 ہزار اسکولوں میں اسپورٹس کمیٹیاں قائم کردی گئی ہیں، جبکہ کھیلوں کی سرگرمیوں کے فروغ کے لیے 450 اسکولوں کو کھیلوں کا سامان بھی فراہم کیا جاچکا ہے۔منصوبے کے تحت سرکاری اسکولوں کے درمیان مختلف کھیلوں کے مقابلے تحصیل، ضلع، ڈویژن اور صوبائی سطح پر ہوں گے۔ مقابلوں میں کامیاب طلبہ کے لیے بالترتیب 5 لاکھ، 3 لاکھ اور ایک لاکھ روپے کی انعامی رقم مقرر کی گئی ہے۔رانا سکندر حیات نے مقابلوں میں حصہ لینے والے طلبہ اور طالبات کے لیے الگ الگ انعامی رقم مختص کرنے کی ہدایت بھی کردی۔
یہ بھی پڑھیں: اسٹیئرنگ کے بغیر گاڑی،ٹیسلا کی روبوٹیکسی تیار
صوبائی وزیر تعلیم نے غیرمعمولی کھیلوں کی صلاحیت رکھنے والے طلبہ کی نشاندہی کرکے انہیں مکمل معاونت فراہم کرنے کی ہدایت کی۔ ان کا کہنا تھا کہ حکومت باصلاحیت طلبہ کو بین الاقوامی سطح پر مواقع حاصل کرنے میں مدد دے گی اور انہیں کھیلوں میں مستقبل بنانے کے لیے بھرپور سپورٹ فراہم کرے گی۔
