اسلام آباد(پاک ترک نیوز ) پاکستان کی نجی فضائی کمپنی ایئر بلیو نے اپنے فضائی بیڑے میں توسیع کے لیے مزید تین جدید طیارے لیز پر حاصل کرنے کا معاہدہ کر لیا ۔
اس پیش رفت کا اعلان ایئربس کے سیلز ڈائریکٹر عادل اصغر نے کیا۔ ان کے مطابق فارنبرو بین الاقوامی فضائی نمائش 2026 کے موقع پر ایئر بلیو، ایئربس اور میکواری ایئر فنانس کے درمیان لیز کے معاہدے پر دستخط کیے گئے۔
عادل اصغر نے بتایا کہ نئے طیاروں کی شمولیت سے ایئر بلیو کے موجودہ بیڑے کو مزید تقویت ملے گی، جس سے فضائی کمپنی ملک کے اندر اور بیرونِ ملک پروازوں کے اپنے نیٹ ورک کو مزید وسعت دے سکے گی۔
یہ بھی پڑھیں: شیخ زاید ایئرپورٹ پر تقریباً3 سال بعد پروازیں بحال
انہوں نے کہا کہ یہ جدید طیارے گزشتہ نسل کے طیاروں کے مقابلے میں 20 فیصد سے زائد کم ایندھن استعمال کرتے ہیں اور کاربن ڈائی آکسائیڈ کے اخراج میں بھی 20 فیصد سے زیادہ کمی لاتے ہیں۔ اس کے علاوہ یہ طیارے مسافروں کو زیادہ آرام دہ سفر اور فضائی کمپنی کو بہتر عملی کارکردگی فراہم کرتے ہیں۔
عادل اصغر نے ایئر بلیو اور میکواری ایئر فنانس کا شراکت داری پر شکریہ ادا کرتے ہوئے کہا کہ یہ معاہدہ پاکستان کے ہوا بازی کے شعبے کے لیے ایک اہم سنگِ میل ثابت ہوگا۔
