مسقط(پاک ترک نیوز) عمان نے آبنائے ہرمز کے انتظام کے لیے ایران کو ’علاقائی میکانزم‘ کی تجویز بھجوا دی ہے۔جس میں خطے کے تمام ممالک کو شامل کیا گیا ہے۔
عرب میڈیا کی رپورٹ کے مطابق، عمان نے ایران کو ایک مشترکہ علاقائی میکانزم کی تجویز دی ہے جس کے تحت رضاکارانہ فیسوں کے ذریعے آبنائے ہرمز کے امور کا انتظام چلایا جائے گا۔
خلیجی خطے کے ایک نام ظاہر نہ کرنے والے ذریعے نے بتایا ہے کہ عمان کی اس تجویز کو علاقائی حمایت بھی حاصل ہے۔ اور اس کے تحت ایران اس اہم آبی گزرگاہ پر تنہا اختیار یا کنٹرول نہیں رکھے گا۔
یہ بھی پڑھیں: عباس عراقچی کے سعودی عرب ،عمان کے وزرائے خارجہ سے ٹیلیفونک رابطے
رپورٹ کے مطابق یہ تجویز آبنائے ملاکا کے ماڈل پر مبنی ہے۔ جہاں اس گزرگاہ کو استعمال کرنے والے جہاز رانی، ماحولیاتی تحفظ اور تلاش و بچاؤ (سرچ اینڈ ریسکیو) کے کاموں کے لیے فنڈز کی فراہمی میں رضاکارانہ طور پر حصہ ڈالتے ہیں۔
امریکہ نے ہفتے کے آخر میں ایران کے خلاف فضائی حملوں کی مہم اچانک معطل کر دی تھی۔ جس سے سفارتی حل کی امیدیں پیدا ہوئی ہیں۔ اس حل سے آبنائے ہرمز میں جہاز رانی کی بحالی ممکن ہو سکے گی۔ یہ وہی گزرگاہ ہے جہاں سے امریکہ اور اسرائیل کی ایران کے خلاف جنگ سے قبل دنیا بھر کی توانائی کی سپلائی کا پانچواں حصہ گزرتا تھا۔
