اسلام آباد ( پاک ترک نیوز) وزیر اعظم شہباز شریف سے کروشیا کے وزیر خارجہ نے ملاقات کی ہے ،ملاقات میں نائب وزیر اعظم اور وزیر خارجہ اسحاق ڈار اور سیکرٹری خارجہ آمنہ بلوچ بھی شریک تھیں ،وزیر اعظم نے کروشیا کے وزیر خارجہ ڈاکٹر گورڈن گرلک راڈمین اور ان کے وفد کا خیرمقدم کیا ۔
وزیراعظم شہبازشریف نے کہا پاکستان اور کروشیا کے تعلقات باہمی احترام اور مشترکہ مفادات پر مبنی ہیں، وزیر اعظم نے دونوں ممالک کے درمیان تجارت، سرمایہ کاری، آئی ٹی، زراعت اور سیاحت میں تعاون بڑھانے کی ضرورت پر زور دیا ۔
وزیر اعظم شہباز شریف کی جانب سے کروشیا کے صدر اور وزیر اعظم کو پاکستان کے سرکاری دورے کی دعوت دی گئی ،کروشیا کے وزیر خارجہ نے پرتپاک استقبال پر وزیر اعظم شہباز شریف سے اظہارِ تشکر کیا ہے ۔
یہ بھی پڑھیں: کروشیا کے وزیر خارجہ کا دورہ پاکستان ،اسحاق ڈار سے ملاقات
کروشیا کے وزیر خارجہ نے علاقائی امن کے لیے پاکستان کے نمایاں کردار کا اعتراف اور خراجِ تحسین پیش کیا اور کہاکروشیا پاکستان کے ساتھ تمام شعبوں میں دوطرفہ تعلقات کو مزید مضبوط بنانے کا خواہاں ہے۔
