اسلام آباد ( پاک ترک نیوز) وزیراعظم محمد شہباز شریف نے معروف فلاحی و سماجی شخصیت عبدالستار ایدھی کی دسویں برسی پر پیغام میں کہا عبدالستار ایدھی جیسی انسان دوست اور خدمت خلق کی داعی شخصیت بلا شبہ قوم کے لیے باعث فخر اور قومی اثاثہ ہے۔
وزیراعظم شہبازشریف نے کہا عبدالستار ایدھی کی گراں قدر قومی و فلاحی خدمات پر انکو خراج عقیدت پیش کرتا ہوں۔رفاہ عامہ کے پر خلوص جذبہ سے سر شار عبدالستار ایدھی نے مسائل کے حل کے سماجی پہلوؤں کو اجاگر کیا ۔
وزیراعظم شہباز شریف نے کہا عبدالستار ایدھی کی بیش قدر خدمات پاکستان کی سماجی تاریخ کا غیر معمولی حصہ ہیں۔ عبدالستار ایدھی جیسی شخصیات نوجوان نسل کے لیۓ قابل تقلید ہیں۔
یہ بھی پڑھیں: بابائے انسانیت عبدالستار ایدھی کو بچھڑے10 برس بیت گئے
وزیراعظم شہباز شریف نے کہا عبدالستار ایدھی نے ثابت کیا کہ ہر شخص اپنے تئیں معاشرتی اصلاح میں تعمیری کردار ادا کرسکتا ہے۔ عبدالستار ایدھی کی عوامی خدمات معاشرے میں احساس، رواداری، باہمی آہنگی جیسی مثبت اقدار کے فروغ میں نمایاں حیثیت رکھتی ہیں۔
وزیراعظم نے مزید کہا عبدالستار ایدھی کی بلندی درجات کے لئے دعا گو ہیں۔ان کی سماجی خدمات کو ہمیشہ یاد رکھا جائے گا۔
