لندن ( پاک ترک نیوز) کیا واقعی برطانیہ کی سڑکیں گرمی سے پگھلنے لگیں؟… اگر ایسا ہے تو پھر پاکستان، بھارت اور خلیجی ممالک میں 45 سے 50 ڈگری سینٹی گریڈ گرمی کے باوجود سڑکیں کیوں نہیں پگھلتیں؟
یہ سوال صرف سوشل میڈیا پر ہی نہیں بلکہ دنیا بھر میں زیر بحث ہے۔ حقیقت جان کر شاید آپ بھی حیران رہ جائیں، کیونکہ معاملہ ناقص تعمیر کا نہیں… بلکہ موسم کے مطابق اختیار کی گئی انجینئرنگ حکمتِ عملی کا ہے۔
یہ سوال صرف سوشل میڈیا پر ہی نہیں بلکہ دنیا بھر میں زیر بحث ہے۔ حقیقت جان کر شاید آپ بھی حیران رہ جائیں، کیونکہ معاملہ ناقص تعمیر کا نہیں… بلکہ موسم کے مطابق اختیار کی گئی انجینئرنگ حکمتِ عملی کا ہے۔
دوسری طرف پاکستان، بھارت اور دیگر ایشیائی ممالک میں درجہ حرارت اکثر 45 ڈگری سینٹی گریڈ سے بھی تجاوز کر جاتا ہے، جبکہ بعض علاقوں میں پارہ پچاس ڈگری کے قریب پہنچ جاتا ہے، اس کے باوجود سڑکیں اسی طرح نہیں پگھلتیں۔تو آخر فرق کہاں ہے؟
ماہرین کے مطابق اس کا تعلق تعمیراتی معیار سے کم اور موسمی حالات سے زیادہ ہے۔ برطانیہ اور یورپ میں سڑکیں سخت سردیوں، برف باری اور بار بار جمنے اور پگھلنے والے موسم کو مدنظر رکھ کر تعمیر کی جاتی ہیں۔
اسی لیے وہاں نسبتاً نرم تارکول استعمال کیا جاتا ہے، تاکہ شدید سردی میں سڑک سکڑنے اور پھیلنے کے باوجود دراڑوں سے محفوظ رہے۔
لیکن جب غیر معمولی گرمی پڑتی ہے اور درجہ حرارت چالیس ڈگری یا اس سے اوپر پہنچ جاتا ہے تو یہی نرم تارکول حرارت جذب کرکے نرم پڑنے لگتا ہے، اور بھاری ٹریفک کے دباؤ سے سڑک کی سطح خراب ہونے لگتی ہے۔
یہ بھی پڑھیں: لاہور اور وسطی پنجاب کے سڑکوں کے منصوبوں کیلئے اربوں روپے مختص
اس کے برعکس ایشیائی ممالک میں صورتحال بالکل مختلف ہے۔ پاکستان، بھارت، سعودی عرب، متحدہ عرب امارات اور دیگر گرم خطوں میں سڑکوں کی تعمیر کے دوران شدید گرمی، تیز دھوپ اور مسلسل بھاری ٹریفک کو مدنظر رکھا جاتا ہے۔
یہاں نسبتاً زیادہ سخت تارکول اور بڑے پتھروں پر مشتمل مضبوط اسفالٹ استعمال کیا جاتا ہے، جو بلند درجہ حرارت میں بھی اپنی سختی برقرار رکھتا ہے اور آسانی سے نرم یا پگھلتا نہیں۔
ماہرین کے مطابق اگر برطانیہ میں ایشیائی طرز کا سخت تارکول استعمال کیا جائے تو سردیوں میں وہ جلد ٹوٹ پھوٹ کا شکار ہو جائے گا، جبکہ اگر پاکستان یا بھارت میں یورپی طرز کا نرم تارکول استعمال کیا جائے تو گرمی میں سڑکیں تیزی سے خراب ہونے لگیں گی۔یعنی ہر خطہ اپنے موسم کے مطابق سڑکیں تعمیر کرتا ہے۔
ماہرین ک مطابق برطانیہ میں سڑکوں کا نرم ہونا یا بعض مقامات پر پگھل جانا ناقص تعمیر کی علامت نہیں، بلکہ یہ اس حقیقت کی نشاندہی ہے کہ دنیا بھر میں انجینئرنگ کے اصول موسم کے مطابق بدلتے ہیں۔
اور جیسے جیسے زمین کا درجہ حرارت بڑھ رہا ہے… ویسے ویسے صرف موسم ہی نہیں، بلکہ دنیا کے انفراسٹرکچر کو بھی نئے چیلنجز کا سامنا ہے۔
