اسلام آباد (پاک ترک نیوز)حکومت نے وفاقی بجٹ میں پبلک سیکٹر ڈویلپمنٹ پروگرام کے تحت لاہور اور وسطی پنجاب میں سڑکوں کے متعدد ترقیاتی منصوبوں کیلئے نئی فنڈنگ مختص کر دی ہے۔
لاہور، ساہیوال اور بہاولنگر موٹروے کو قصور روڈ پر واقع راجہ جنگ انٹرچینج سے ملانے والی لنک روڈ کی تعمیر کیلئے 2 ارب روپے مختص کیے گئے ہیں۔ اس منصوبے سے جنوبی پنجاب اور لاہور کے درمیان آمدورفت میں آسانی پیدا ہونے کی توقع ہے۔
کراچی-لاہور موٹروے منصوبے کے لاہور-ملتان موٹروے (ایم-3) سیکشن کیلئے ایک ارب روپے رکھے گئے ہیں، جو ملک کی اہم تجارتی اور سفری شاہراہوں میں شمار ہوتا ہے۔
شیخوپورہ ضلع کے علاقے شرقپور کے قریب احسن کے مقام پر عبدالحکیم موٹروے (ایم-3) انٹرچینج کی تعمیر کیلئے 65 کروڑ روپے مختص کیے گئے ہیں۔ اس منصوبے سے صنعتی اور زرعی علاقوں تک رسائی بہتر ہوگی۔
لاہور کے شمالی حصے شاہدرہ میں امامیہ کالونی ریلوے کراسنگ پر اوور ہیڈ برج کی تعمیر کیلئے 25 کروڑ روپے فراہم کیے گئے ہیں، جس سے ٹریفک کے دباؤ میں کمی اور آمدورفت میں سہولت متوقع ہے۔
دریائے راوی پر سید والا کے مقام پر زیر تعمیر پل کیلئے مزید 5 کروڑ روپے مختص کیے گئے ہیں تاکہ منصوبے پر کام جاری رکھا جا سکے۔
