واشنگٹن(پاک ترک نیوز)سیٹلائٹ انٹرنیٹ سروس فراہم کرنے والی کمپنی اسٹارلنک نے امریکا کے بعض علاقوں میں رہائشی انٹرنیٹ پیکجز کے لیے قیمتوں کا نیا نظام آزمانا شروع کر دیا ہے، جس کے تحت صارفین کے ماہانہ بل میں 20 فیصد تک اضافہ ہو سکتا ہے، جبکہ بعض علاقوں میں قیمتیں کم بھی کی جا رہی ہیں۔
ٹیکنالوجی ویب سائٹ پی سی میگ کے مطابق اسپیس ایکس کی ملکیت اسٹارلنک اب منتخب علاقوں میں طلب اور نیٹ ورک کی گنجائش کے مطابق ہر تین ماہ بعد انٹرنیٹ پیکجز کی قیمتوں کا جائزہ لے گی۔
رپورٹ کے مطابق امریکی ریاست میسوری کے ایک صارف کا 100 ایم بی پی ایس انٹرنیٹ پیکج 50 ڈالر سے بڑھا کر 60 ڈالر 50 سینٹ ماہانہ کر دیا گیا ہے، جبکہ ریزیڈینشل میکس پیکج کی قیمت 130 ڈالر سے بڑھ کر 156 ڈالر ماہانہ ہو گئی ہے۔
یہ بھی پڑھیں: دبئی کے حکمران کی سعودی ولی عہد محمد بن سلمان کو یو این واٹر کانفرنس میں شرکت کی دعوت
دوسری جانب ریاست میسوری کے کنساس سٹی اور ریاست کنساس کے بعض علاقوں میں صارفین کو کم قیمتوں پر انٹرنیٹ پیکجز فراہم کیے جا رہے ہیں۔
اسٹارلنک کے مطابق نئے وی تھری سیٹلائٹس کے ذریعے نیٹ ورک کی گنجائش بڑھائی جا رہی ہے، تاہم صارفین کی تعداد میں تیزی سے اضافے کے باعث مختلف علاقوں میں قیمتوں میں ردوبدل کیا جا سکتا ہے۔
