کراچی (پاک ترک نیوز )پاکستان نے کراچی اور لاہور کے ہوائی اڈوں پر جدید فضائی ٹریفک انتظامی نظام نصب کرنے کے لیے 10 ارب روپے کا منصوبہ شروع کردیا ہے۔
ذرائع کے مطابق منصوبے کے تحت کراچی کے جناح بین الاقوامی ہوائی اڈے اور لاہور کے علامہ اقبال بین الاقوامی ہوائی اڈے پر جدید فضائی ٹریفک انتظامی اور صوتی رابطے کے نظام نصب کیے جائیں گے۔
دونوں ہوائی اڈوں کے فضائی ٹریفک کنٹرول مراکز کو بھی جدید تقاضوں کے مطابق بہتر بنایا جائے گا، تاکہ فضائی آمدورفت کو زیادہ مؤثر اور محفوظ بنایا جاسکے۔
ذرائع کے مطابق منصوبے کے لیے تکنیکی پیشکشیں کھولنے کا مرحلہ مکمل ہوچکا ہے، جبکہ تکنیکی جانچ میں کامیاب ہونے والی کمپنیوں کی مالی پیشکشیں اگلے مرحلے میں کھولی جائیں گی۔
منصوبے میں دونوں ہوائی اڈوں پر فضائی ٹریفک انتظامی نظام کے ساتھ صوتی رابطے اور کنٹرول کا جدید نظام بھی نصب کیا جائے گا۔
پاکستان ایئرپورٹس اتھارٹی کے مطابق یہ منصوبہ ملک کے فضائی ٹریفک انتظامی ڈھانچے کو جدید بنانے کی وسیع کوششوں کا حصہ ہے، جس سے فضائی سفر کے انتظام، نگرانی اور حفاظت کے نظام میں بہتری آنے کی توقع ہے۔
