واشنگٹن (پاک ترک نیوز )امریکی ایوان نمائندگان نے وزیر جنگ پیٹ ہیگسیتھ کے خلاف مواخذے کی قرارداد مسترد کر دی، قرارداد کے حق میں 204 جبکہ مخالفت میں 211 ووٹ ڈالے گئے۔
امریکی میڈیا کے مطابق مواخذے کی قرارداد صدر ڈونلڈ ٹرمپ کی اپنی جماعت ری پبلکن پارٹی کے رکن تھامس میسی نے پیش کی تھی۔ انہوں نے ایران کے خلاف جنگ کو غیر قانونی قرار دیتے ہوئے مؤقف اختیار کیا تھا کہ پیٹ ہیگسیتھ نے کانگریس کو نظرانداز کیا اور فوجی کارروائی کے لیے اختیارات کا غیر قانونی استعمال کیا۔
قرارداد میں وزیر جنگ پر ایران کے شہر میناب میں ایک اسکول پر امریکی حملے کے نتیجے میں بچوں اور دیگر بے گناہ شہریوں کی ہلاکتوں کا بھی الزام عائد کیا گیا تھا۔ قرارداد پیش کرنے والے رکن کا کہنا تھا کہ ہیگسیتھ نے امریکی آئین کی خلاف ورزی کی اور اپنے عہدے کا غلط استعمال کیا۔
مواخذے کی قرارداد مسترد ہونے پر امریکی صدر ڈونلڈ ٹرمپ کا ردعمل بھی سامنے آگیا۔ ٹرمپ نے کہا کہ پیٹ ہیگسیتھ کے مواخذے کی کوشش بری طرح ناکام ہوگئی، تھامس میسی کے سوا تمام ری پبلکن ارکان نے وزیر جنگ کی حمایت میں ووٹ دیا۔
ڈونلڈ ٹرمپ نے مزید کہا کہ وینزویلا اور ایران میں کامیابیاں حاصل ہوئیں جبکہ ریکارڈ تعداد میں فوجیوں کی بھرتیاں کی گئیں۔ ان کا کہنا تھا کہ ایوان نے پیٹ ہیگسیتھ کو بری کر دیا، ڈیموکریٹس امریکا کے ساتھ زیادتی کر رہے ہیں اور انہیں روکا جانا چاہیے۔
دوسری جانب مواخذے کی قرارداد پر ووٹنگ سے قبل پیٹ ہیگسیتھ نے کہا تھا کہ یہ قرارداد ان کا کچھ نہیں بگاڑ سکتی، مواخذے کی کوشش محض ایک تماشا اور امریکی فوجیوں کے خلاف سازش ہے۔
امریکی وزیر جنگ کا کہنا تھا کہ امریکا کی تاریخ میں فوجی کارروائی کے دوران کسی وزیر جنگ کو عہدے سے نہیں ہٹایا گیا، جبکہ جاری فوجی کارروائی قانونی حیثیت رکھتی ہے۔
