واشنگٹن (پاک ترک نیوز)خلائی ٹیکنالوجی کے شعبے میں ایک اہم تجرباتی مشن ناکامی سے دوچار ہو گیا، جہاں امریکی کمپنی اسٹار فش اسپیس کا پہلا سیٹلائٹ سروسنگ خلائی جہاز اوٹر 24 سی زمین کے مدار میں رابطہ منقطع ہونے کے بعد ناکارہ ہو گیا۔
سیٹلائٹ یکم اکتوبر کو اسپیس ایکس کے ٹرانسپورٹر 18 مشن کے ذریعے خلا میں بھیجا گیا تھا۔اس مشن میں مجموعی طور پر 130 پے لوڈز زمین کے نچلے مدار میں پہنچائے گئے تھے۔
اوٹر 24 سی ناسا کے تجرباتی مشن ایس ایس پی آئی سی وائی (SSPICY) کا حصہ تھا، جس کا مقصد مستقبل میں خلائی ملبے کو ہٹانے، خراب سیٹلائٹس کا معائنہ کرنے اور خلا میں موجود فعال خلائی جہازوں کی مرمت سے متعلق ٹیکنالوجی کا تجربہ کرنا تھا۔
منصوبے کے تحت 335 کلوگرام وزنی اوٹر 24 سی نے دو سال کے دوران امریکی ساخت کے چار ناکارہ خلائی اجسام کے قریب جا کر ان کا تفصیلی معائنہ کرنا تھا، تاہم خلائی جہاز ابتدائی تکنیکی مراحل ہی میں رابطہ کھو بیٹھا۔
اسٹار فش اسپیس کے مطابق سیٹلائٹ کو مدار میں بھیجنے کے بعد اس کی تکنیکی جانچ جاری تھی کہ اچانک اس سے ڈیٹا موصول ہونا بند ہو گیا۔
کمپنی نے تحقیقات کے بعد بتایا کہ سیٹلائٹ کے بس سسٹم میں موجود فالٹ پروٹیکشن سافٹ ویئر کی خرابی کے باعث ریڈیو بند ہو گیا، جس کے بعد رابطہ بحال نہیں کیا جا سکا۔
اسٹار فش اسپیس، ناسا اور سیٹلائٹ کے بس سسٹم کی فراہم کنندہ کمپنی آسٹرو ڈیجیٹل نے مشترکہ طور پر فیصلہ کیا ہے کہ اوٹر 24 سی کو دوبارہ فعال کرنا ممکن نہیں۔
کمپنی کا کہنا ہے کہ اس تکنیکی ناکامی سے حاصل ہونے والے تجربات مستقبل کے خلائی مشنز میں مددگار ثابت ہوں گے اور ایسی خرابیوں سے بچنے کے لیے ضروری تبدیلیاں کی جا رہی ہیں۔
دوسری جانب اسٹار فش اسپیس کا ایک اور تجرباتی خلائی جہاز اوٹر پَپ 2 اپنے مشن میں پیش رفت کر رہا ہے۔ جون 2025 میں خلا میں بھیجا گیا یہ جہاز آسٹریلوی کمپنی گلمور اسپیس کے سیٹلائٹ ایلارا سیٹ کے قریب پہنچ چکا ہے۔
یہ بھی پڑھیں: چین کی بحری طاقت میں ایک اور اہم پیش رفت
کمپنی کے مطابق اوٹر پَپ 2 اپنے ہدف سے صرف 25 میٹر کے فاصلے تک پہنچنے میں کامیاب رہا ہے اور اب اس کا اگلا مرحلہ ڈاکنگ یعنی دوسرے خلائی جہاز کے ساتھ منسلک ہونے کی کوشش ہے۔
