ٹمبلر رج: (پاک ترک نیوز)کینیڈا کے صوبے برٹش کولمبیا کے علاقے ٹمبلر رج میں فائرنگ کے ایک المناک واقعے میں 10 افراد جان سے ہاتھ دھو بیٹھے جبکہ 27 افراد زخمی ہو گئے۔
رائل کینیڈین ماؤنٹڈ پولیس (RCMP) کے مطابق فی الحال عوام کو کسی مزید خطرے کا سامنا نہیں۔پولیس کے مطابق منگل کی دوپہر ٹمبلر رج سیکنڈری اسکول میں ایک شوٹر کی اطلاع موصول ہوئی، جس کے بعد فوری کارروائی کی گئی۔
اسکول کے اندر سے 7 لاشیں برآمد ہوئیں جن میں 6 متاثرہ افراد اور ایک مشتبہ حملہ آور شامل ہے۔پولیس نے بتایا کہ ایک اور زخمی شخص اسپتال لے جاتے ہوئے دم توڑ گیا، یوں ہلاکتوں کی تعداد 8 ہو گئی۔ بعد ازاں تفتیش کے دوران ایک دوسرے مقام پر واقع ایک رہائشی مکان سے 2 مزید افراد کی لاشیں ملیں، جنہیں اسی واقعے سے جوڑا جا رہا ہے۔
RCMP کے مطابق مشتبہ حملہ آور خود کو لگنے والی گولی کے باعث ہلاک ہوا اور یہی اس کی موت کی وجہ بنی۔ پولیس کا کہنا ہے کہ کسی اور ملزم یا مزید حملوں کا کوئی ثبوت نہیں ملا۔
پولیس کے مطابق 2افراد کو تشویشناک حالت میں ہیلی کاپٹر کے ذریعے اسپتال منتقل کیا گیا جبکہ 25 دیگر زخمیوں کو مقامی طبی مرکز میں علاج فراہم کیا جا رہا ہے۔
تحقیقات کے سلسلے میں پولیس قریبی گھروں اور املاک کی تلاشی بھی لے رہی ہے تاکہ یہ معلوم کیا جا سکے کہ کہیں کوئی اور زخمی یا اس واقعے سے منسلک فرد تو موجود نہیں۔
کینیڈین سرکاری نشریاتی ادارے CBC کے مطابق پولیس نے ابھی تک مشتبہ حملہ آور کی شناخت ظاہر نہیں کی، تاہم اسے بھورے بالوں والی خاتون، کے طور پر بیان کیا گیا ہے۔
کینیڈا کے وزیر اعظم مارک کارنی نے فائرنگ کے واقعے پر گہرے دکھ اور صدمے کا اظہار کرتے ہوئے کہا کہ وہ اس سانحے پر شدید غمزدہ ہیں۔ انہوں نے متاثرہ خاندانوں سے دلی ہمدردی اور دعاؤں کا اظہار کیا اور فرسٹ ریسپانڈرز کی جرات اور قربانی کو خراجِ تحسین پیش کیا۔
خبر رساں ادارے رائٹرز کے مطابق وزیر اعظم مارک کارنی نے واقعے کے بعد جرمنی میں ہونے والی سیکیورٹی کانفرنس میں شرکت کا اپنا دورہ منسوخ کر دیا۔برٹش کولمبیا کے وزیر اعلیٰ ڈیوڈ ایبی نے بھی متاثرہ کمیونٹی سے مکمل تعاون کا وعدہ کرتے ہوئے کہا کہ حکومت اس ناقابلِ تصور سانحے میں متاثر ہونے والے ہر فرد کے ساتھ کھڑی ہے۔
صوبائی وزیر برائے عوامی تحفظ نینا کریگر نے بھی کہا کہ یہ واقعہ نہ صرف ٹمبلر رج بلکہ پورے صوبے کو ہلا کر رکھ دینے والا ہے، اور حکومت تحقیقات اور متاثرین کی مدد کے لیے تمام وسائل بروئے کار لائے گی۔
کینیڈا میں فائرنگ کا خوفناک واقعہ، 10 افراد ہلاک، درجنوں زخمی
