اوٹاوا (پاک ترک نیوز )کینیڈا نے نیا 20 ڈالر کا نوٹ متعارف کرا دیا ہے، جس پر پہلی بار بادشاہ چارلس سوم کی تصویر شامل کی گئی ہے۔
بینک آف کینیڈا کے گورنر ٹف میکلم نے اوٹاوا میں نئے نوٹ کی رونمائی کی۔ یہ کینیڈا کی تاریخ کا پہلا کرنسی نوٹ ہے جس پر کنگ چارلس کی تصویر موجود ہے۔ ان کی تصویر نے آنجہانی ملکہ الزبتھ دوم کی جگہ لی ہے۔
بینک آف کینیڈا کے مطابق یہ پیش رفت تاریخی حیثیت رکھتی ہے۔ کینیڈین کرنسی نوٹ پر کسی نئے بادشاہ یا ملکہ کی تصویر 70 سال سے زائد عرصے بعد شامل کی گئی ہے۔
ملکہ الزبتھ دوم کی تصویر پہلی مرتبہ 1935 میں کینیڈا کے ابتدائی 20 ڈالر کے نوٹ پر شائع ہوئی تھی، جب وہ ایک نوجوان شہزادی تھیں۔
نیا 20 ڈالر کا نوٹ عمودی انداز میں تیار کیا گیا ہے اور اس کا بنیادی رنگ سبز ہے۔ نوٹ پولیمر سے بنایا گیا ہے، جبکہ اس کی پشت پر کینیڈین نیشنل ویمی یادگار کی تصویر برقرار رکھی گئی ہے۔
نئے نوٹ میں جدید حفاظتی ٹیکنالوجی بھی شامل کی گئی ہے، جسے بینک آف کینیڈا نے پہلی بار استعمال کیا ہے۔
نوٹ کے سامنے بادشاہ چارلس کی تصویر کے گرد پھولوں اور پتوں سے مزین ایک خوبصورت نقش و نگار موجود ہے، جو ماحول کے تحفظ کے لیے ان کی طویل وابستگی سے متاثر ہوکر تیار کیا گیا ہے۔
نوٹ پر کینیڈا کے 13 صوبوں اور علاقوں کی نمائندگی کرنے والے پھولوں کے نشانات بھی شامل کیے گئے ہیں۔
اس کے علاوہ نوٹ میں ایک گول شفاف کھڑکی موجود ہے، جو دونوں جانب سے نظر آتی ہے۔ اس میں ایسے پودوں کی عکاسی کی گئی ہے جو کینیڈا کے مقامی باشندوں کے لیے ثقافتی اہمیت رکھتے ہیں۔
جعلی نوٹوں کی روک تھام کے لیے نئے 20 ڈالر کے نوٹ میں جامنی حفاظتی پٹی بھی شامل کی گئی ہے۔ نوٹ کو حرکت دینے پر اس پٹی میں موجود اشکال گھومتی، تبدیل ہوتی اور حرکت کرتی ہوئی دکھائی دیتی ہیں۔
