تہران ( پاک ترک نیوز) ایران اور امریکہ کے درمیان کشیدگی مزید شدت اختیار کر گئی ہے۔ ایران کی پاسدارانِ انقلاب نے دعویٰ کیا ہے کہ اردن میں قائم ایک امریکی فوجی اڈے پر بیلسٹک میزائلوں سے حملہ کیا گیا، جس میں تین ایف-35 جنگی طیارے اور ایک فوجی ہیلی کاپٹر تباہ کر دیا گیا۔
پاسدارانِ انقلاب کے مطابق حملے میں متعدد بیلسٹک میزائل داغے گئے اور امریکی فوج کو بھاری نقصان پہنچایا گیا۔ ایرانی حکام نے اپنے دعوے کے ثبوت کے طور پر اردن میں امریکی طیاروں کے ہینگرز کی مبینہ سیٹلائٹ تصاویر بھی جاری کی ہیں، جن میں حملے کے بعد کی صورتحال دکھانے کا دعویٰ کیا گیا ہے۔
دوسری جانب امریکی فوج نے ایران کے تمام دعوؤں کو سختی سے مسترد کرتے ہوئے کہا ہے کہ اردن میں کسی بھی امریکی جنگی طیارے کو نقصان نہیں پہنچا۔ امریکی فوج کے مطابق ایرانی میزائلوں اور ڈرونز کو بروقت فضاء میں ہی تباہ کر دیا گیا، جس کے باعث امریکی تنصیبات اور طیارے محفوظ رہے۔
یہ بھی پڑھیں: امریکی جنگ کے باوجود ایرانی معیشت کیوں نہیں ٹوٹی؟
امریکی فوجی حکام کا کہنا ہے کہ ایرانی حملے سے متعلق جاری کی گئی اطلاعات اور تصاویر حقائق پر مبنی نہیں، جبکہ آپریشنل صلاحیت پر کوئی اثر نہیں پڑا۔
