راولپنڈی (پاک ترک نیوز )راولپنڈی کے تھانہ روات میں بنکاک سے شادی کے جھانسے پر پاکستان بلائی گئی خاتون کی مدعیت میں مبینہ جنسی زیادتی، تشدد اور رقم لے جانے کے الزام میں مقدمہ درج کرلیا گیا۔
مقدمے کے مطابق متاثرہ خاتون کی دو سال قبل بنکاک میں ملزم عامر سہیل سے ملاقات ہوئی، جس کے بعد دونوں میں دوستی ہوگئی۔
خاتون کے مطابق ملزم نے شادی کا وعدہ کرکے اسے پاکستان بلایا۔ چار ماہ قبل دونوں نے ایک نجی ہاؤسنگ سوسائٹی میں کرائے پر فلیٹ لے کر رہائش اختیار کی۔
متاثرہ خاتون نے مقدمے میں الزام عائد کیا کہ ملزم عامر سہیل نے اسے متعدد بار مبینہ جنسی زیادتی کا نشانہ بنایا، جبکہ شادی کا مطالبہ کرنے پر ٹال مٹول سے کام لیتا رہا۔
خاتون کے مطابق ملزم اسے فلیٹ سے باہر نہیں جانے دیتا تھا اور مبینہ طور پر تشدد کا نشانہ بھی بناتا رہا۔
متاثرہ خاتون نے مزید الزام عائد کیا کہ ملزم جاتے ہوئے اس کے پیسے بھی اپنے ساتھ لے گیا۔
پولیس کے مطابق مقدمے میں نامزد ملزم عامر سہیل کو گرفتار کرلیا گیا ہے، جبکہ مقدمے کی تفتیش ایس ایس آئی او یونٹ کے سپرد کردی گئی ہے۔
پولیس کا کہنا ہے کہ واقعے کے تمام پہلوؤں سے تحقیقات کی جا رہی ہیں اور مزید قانونی کارروائی تفتیش کی روشنی میں عمل میں لائی جائے گی۔
