مہمند (پاک ترک نیوز)صدرِ مملکت آصف علی زرداری نے ضلع مہمند کی تحصیل پنڈیالی میں انسدادِ پولیو مہم کے دوران سکیورٹی پر مامور پولیس اہلکاروں پر فائرنگ کے واقعے کی شدید مذمت کی ہے۔
صدر مملکت نے پولیس اہلکاروں کی شہادت پر گہرے دکھ اور افسوس کا اظہار کرتے ہوئے کہا کہ بچوں کو پولیو سے محفوظ بنانے کی قومی مہم میں فرائض انجام دینے والے اہلکاروں کو نشانہ بنانا انتہائی افسوسناک اور قابلِ مذمت ہے۔
یہ بھی پڑھیں: مہمند میں پولیو ٹیم کی سکیورٹی پر فائرنگ،2اہلکار شہید
آصف علی زرداری نے شہید پولیس اہلکاروں کی فرض شناسی، بہادری اور قومی خدمات کو خراجِ عقیدت پیش کیا اور شہداء کے اہلِ خانہ سے دلی ہمدردی اور تعزیت کا اظہار کیا۔
صدر مملکت نے زخمی پولیس اہلکار کی جلد صحت یابی کے لیے دعا کرتے ہوئے کہا کہ پولیو ٹیموں کی حفاظت پر مامور پولیس اہلکار قومی فریضہ انجام دے رہے ہیں اور ان کی قربانیوں کو فراموش نہیں کیا جائے گا۔
