کراچی (پاک ترک نیوز )کراچی کے نوجوان تاجر میر رضا کی قبر کشائی کے بعد کیے گئے پوسٹ مارٹم کی ابتدائی میڈیکل رپورٹ سامنے آگئی ۔
ذرائع کے مطابق ابتدائی رپورٹ میں انکشاف ہوا ہے کہ میر رضا کو گولی پیچھے سے لگی تھی، جبکہ ان کے جسم پر تشدد کے نشانات بھی پائے گئے ہیں۔
ذرائع کا کہنا ہے کہ پولیس سرجن کی جانب سے اٹھائے گئے تمام 14 سوالات کے جوابات ابتدائی میڈیکل رپورٹ میں سامنے آگئے ہیں۔
اس سے قبل میر رضا کی قبر کشائی کے بعد پوسٹ مارٹم مکمل کیا گیا، جس کے بعد ان کی میت کی دوبارہ تدفین کردی گئی۔
ذرائع کے مطابق پوسٹ مارٹم کے دوران میر رضا کی لاش سے مختلف نمونے بھی حاصل کیے گئے، جنہیں کیمیائی تجزیے کے لیے متعلقہ لیبارٹری بھجوا دیا گیا ہے۔
میڈیکل بورڈ حکام نے میر رضا کے والد اور والدہ کے ڈی این اے سیمپلز لینے کا بھی فیصلہ کیا ہے۔
میر رضا کے والد نے قبر کشائی کی کارروائی پر اطمینان کا اظہار کرتے ہوئے کہا تھا کہ دعا ہے پوسٹ مارٹم میں جو کچھ پہلے ہوا، اب نہ ہو۔
میر رضا کے والد کا کہنا تھا کہ پوسٹ مارٹم کے بعد جو بھی رپورٹ سامنے آئے گی، وہ اسے تسلیم کریں گے۔
پوسٹ مارٹم کی حتمی رپورٹ اور کیمیائی تجزیے کے نتائج سامنے آنے کے بعد واقعے سے متعلق مزید حقائق واضح ہونے کی توقع ہے۔
