لاہور( پاک ترک نیوز) لاہور کے علاقے ویلنشیا ٹاؤن میں ماں اور3بچوں کی ہلاکت کا ڈراپ سین ہو گیا ،ماں ہی قاتلہ نکلی ۔ پولیس کے مطابق خاتون نے مبینہ طور پر اپنے تینوں بچوں کو زہر دے کر قتل کیا، جبکہ بعد ازاں خود بھی وہی زہریلا مادہ استعمال کیا۔
ڈی آئی جی انویسٹی گیشن ذیشان رضا کے مطابق واقعے کی تحقیقات کے دوران آن لائن کیمیکل فروخت کرنے والے ایک دکاندار اور پارسل پہنچانے والے رائیڈر کو گرفتار کر لیا گیا ہے۔ پولیس کے مطابق کیمیکل شاپ کا مالک انٹرنیٹ کے ذریعے کیمیکل فروخت کرتا تھا۔
تحقیقات کے مطابق خاتون مبینہ طور پر انٹرنیٹ پر خودکشی اور مرنے کے طریقوں سے متعلق معلومات تلاش کرتی رہی۔ پولیس کا کہنا ہے کہ خاتون نے کیمیکل اپنے گھر منگوانے کے بجائے اپنی ایک دوست کے پتے پر پارسل وصول کیا۔
یہ بھی پڑھیں: لاہور سمیت پنجاب میں مطلع ابر آلود،6اگست تک بارشوں کی پیش گوئی
ڈی آئی جی کے مطابق خاتون نے مبینہ طور پر اپنے تینوں بچوں کو زہر ملی آئس کریم کھلائی اور بعد میں خود بھی وہی آئس کریم کھائی۔ تحقیقات میں یہ بھی سامنے آیا ہے کہ خاتون نے اپنے شوہر کو بھی زہر ملی آئس کریم کھلانے کی کوشش کی، تاہم وہ محفوظ رہے۔
پولیس حکام کا کہنا ہے کہ واقعے کے تمام پہلوؤں کی مزید تحقیقات جاری ہیں، جبکہ گرفتار ملزمان سے بھی پوچھ گچھ کی جا رہی ہے تاکہ کیمیکل کی خریداری، فراہمی اور استعمال سے متعلق مزید حقائق سامنے لائے جا سکیں۔ ابتدائی تفتیش کے نتائج کی بنیاد پر آئندہ قانونی کارروائی عمل میں لائی جائے گی۔
