اسلام آباد(پاک ترک نیوز) حکومت نے للہ جہلم دو رویہ شاہراہ منصوبے کی تکمیمل کے لیے دسمبر کی نئی ڈیڈ لائن مقرر کر دی۔100 کلومیٹر سے زائد طویل یہ منصوبہ پنجاب کے دو اہم شہروں کے درمیان سفری رابطے کو بہتر بنانے کے لیے تعمیر کیا جا رہا ہے۔۔
اس فیصلے کا اعلان وزیر مملکت برائے خزانہ و ریلوے، بلال اظہر کیانی کی زیر صدارت ہونے والے جائزہ اجلاس میں کیا گیا، جس میں منصوبے کی پیش رفت کا تفصیلی جائزہ لیا گیا۔
اجلاس میں منصوبے سے متعلق متعدد زیر التوا امور پر غور کیا گیا، جن میں شاہراہ کے نئے حصوں پر بجلی کے کھمبوں کی تنصیب، ریلوے کراسنگز کی تعمیر اور ان کی توسیع شامل تھی۔
بلال اظہر کیانی نے متعلقہ تمام اداروں کو ہدایت کی کہ وہ باہمی تعاون کو مزید مؤثر بنائیں، تکنیکی رکاوٹوں کو فوری طور پر دور کریں اور منصوبے کو مقررہ مدت یعنی دسمبر تک مکمل کرنے کے لیے تمام ضروری اقدامات یقینی بنائیں۔
اجلاس میں پنڈ دادن خان اور ہرن پور میں واقع دو ریلوے کراسنگز کی توسیع اور ہائی وولٹیج بجلی کی ترسیلی لائنوں کی منتقلی کے منصوبوں کو بھی حتمی شکل دے دی گئی۔
