لاہور( پاک ترک نیوز) آئن اسٹائن کا نظریہ ایک بار پھر تجربے کی تیاری میں، سائنس دانوں نے ایسی جدید کوانٹم مشین کا تصور پیش کردیا جو زمین کی گردش سے خلا اور وقت میں پیدا ہونے والے انتہائی معمولی خم کو منٹوں میں ناپ سکے گی۔کیا زمین صرف اپنے محور پر گھومتی ہے یا اس کی گردش اپنے اردگرد موجود خلا اور وقت کو بھی گھما دیتی ہے؟ آئن اسٹائن کے نظریہ اضافیتِ عامہ کے مطابق زمین جیسے بڑے اور گردش کرنے والے اجسام اپنے گرد موجود اسپیس ٹائم کو بھی کھینچتے اور گھماتے ہیں۔ طبیعیات میں اس مظہر کو فریم ڈریگنگ کہا جاتا ہے۔
اب سائنس دانوں نے اس انتہائی باریک اثر کو زمین پر ہی ایک چھوٹی تجربہ گاہ میں ناپنے کے لیے نئی کوانٹم ڈیوائس کا تصور پیش کیا ہے۔تحقیق کے مطابق مجوزہ ٹیبل ٹاپ کوانٹم سینسر اگر تیار ہوگیا تو یہ زمین کی گردش سے پیدا ہونے والے اسپیس ٹائم کے خم کو اتنی ہی درستگی سے ناپ سکے گا جتنی درستگی بہترین سیٹلائٹ تجربات میں حاصل کی گئی ہے، تاہم اس کے لیے برسوں کے بجائے صرف چند منٹ درکار ہوسکتے ہیں۔تحقیق کے مرکزی مصنف اور یونیورسٹی آف کیلیفورنیا برکلے کے محقق کائی آئزک ایلرز کے مطابق گردش کرنے والے نظام میں گھڑیوں کو مکمل طور پر ہم آہنگ رکھنا ممکن نہیں رہتا۔ یہ مظہر آئن اسٹائن کے نظریہ اضافیت سے مطابقت رکھتا ہے۔اس سے پہلے سائنس دان زمین کے گرد گردش کرنے والے سیٹلائٹس اور جائروسکوپس کی مدد سے اس اثر کی پیمائش کرچکے ہیں۔ 2011 میں ناسا کے گریویٹی پروب بی مشن نے آئن اسٹائن کی پیش گوئی کی تصدیق کی، تاہم اس پیمائش میں غلطی کا امکان تقریباً 18 فیصد تھا۔ بعد میں لیزر سے ٹریک کیے جانے والے سیٹلائٹس کی مدد سے یہ درستگی بہتر ہوئی۔
یہ بھی پڑھیں: 77 سال میں چین کی فضائیہ کا بڑا سفر، جدید جنگی طیاروں اور اسٹیلتھ ڈرونز سے فضائی طاقت میں اضافہ
تحقیق کے مطابق جولائی 2026 میں شائع ہونے والے ایک مطالعے میں LARES-2 سیٹلائٹ کے ذریعے غلطی کی شرح صرف 0.2 فیصد تک لانے کی اطلاع دی گئی۔نئی مجوزہ ڈیوائس میں سپر فلوئڈ ہیلیم اور جوزفسن جنکشن پر مبنی کوانٹم ٹیکنالوجی استعمال کرنے کی تجویز ہے۔ سائنس دانوں کا خیال ہے کہ انتہائی کم درجہ حرارت پر یہ نظام غیرمعمولی حساسیت کے ساتھ زمین کی گردش کے اثرات محسوس کرسکتا ہے۔
