اسلام آباد ( پاک ترک نیوز) پاکستان کے معروف ہوٹل برانڈ پرل کانٹینینٹل کی مالک کمپنی پاکستان سروسز لمیٹڈ کی تنظیمِ نو کے حوالے سے بڑی پیش رفت سامنے آئی ہے۔ ٹھٹہ سیمنٹ کمپنی لمیٹڈ نے فوجی فاؤنڈیشن کے ساتھ مجوزہ تنظیمِ نو سے متعلق حتمی معاہدہ کر لیا ہے۔ٹھٹہ سیمنٹ نے بدھ کے روز پاکستان اسٹاک ایکسچینج کو جمع کرائی گئی اطلاع میں معاہدے کی تصدیق کرتے ہوئے بتایا کہ اس پر عمل درآمد متعلقہ کارپوریٹ، ریگولیٹری اور دیگر ضروری منظوریوں سے مشروط ہوگا۔یہ پیش رفت ایسے وقت میں سامنے آئی ہے جب چند روز قبل فوجی فاؤنڈیشن نے پاکستان سروسز لمیٹڈ کے تقریباً 19.70 فیصد حصص 6 ارب 55 کروڑ روپے میں حاصل کیے تھے۔
دستاویزات کے مطابق فوجی فاؤنڈیشن نے 2 نومبر 2026 کو پاکستان سروسز لمیٹڈ کے 64 لاکھ 6 ہزار 797 ووٹنگ شیئرز فی شیئر ایک ہزار 22 روپے 42 پیسے کے حساب سے خریدے، جس کے بعد کمپنی میں اس کی مجموعی حصص داری 19.70 فیصد ہو گئی۔پاکستان سروسز لمیٹڈ 1958 میں قائم ہوئی تھی اور اس کا بنیادی کاروبار پرل کانٹینینٹل ہوٹلز کی ملکیت اور انتظام ہے۔ کمپنی اپنے برانڈ اور نام کے استعمال کے لیے فرنچائز بھی دیتی ہے، جبکہ لاہور میں کم بجٹ کا ایک ہوٹل بھی چلاتی ہے۔کمپنی کی حصص داری میں گزشتہ عرصے کے دوران بھی نمایاں تبدیلیاں ہوئی ہیں۔ گزشتہ سال جولائی میں اے کے ڈی گروپ ہولڈنگز نے پاکستان سروسز لمیٹڈ کے 27.95 فیصد حصص 6 ارب 36 کروڑ روپے سے زائد میں حاصل کیے تھے۔ اسی روز داؤد جان محمد نے بھی کمپنی کے 28 فیصد ووٹنگ شیئرز فی شیئر 700 روپے کے حساب سے خریدے۔
یہ بھی پڑھیں: غزہ میں اسرائیلی جنگ صرف نسل کشی نہیں، ماحولیاتی تباہی بھی ہے، ترک صدر
بعد ازاں ٹھٹہ سیمنٹ نے بھی پاکستان سروسز لمیٹڈ کے 28 فیصد حصص 6 ارب 45 کروڑ روپے، یعنی فی شیئر 710 روپے کے حساب سے حاصل کرنے کا اعلان کیا تھا۔ستمبر 2026 میں ٹھٹہ سیمنٹ نے اسلام آباد ہائی کورٹ میں زیرِ التوا معاملے کو باہمی طور پر حل کرنے کے لیے پاکستان سروسز لمیٹڈ کی مجوزہ تنظیمِ نو پر اصولی اتفاق کیا تھا۔
