لاہور( پاک ترک نیوز) مون سون کی بارشیں جہاں موسم کو خوشگوار بناتی ہیں، وہیں بعض افراد کے لیے صحت کے مسائل میں اضافے کا سبب بھی بن سکتی ہیں۔ خصوصاً ہائی بلڈ پریشر، ذیابیطس، دل کے امراض اور کولیسٹرول کے مریضوں کو اس موسم میں اپنی صحت پر خصوصی توجہ دینے کا مشورہ دیا جا رہا ہے۔
طبی ماہرین کے مطابق بارش کے دوران درجہ حرارت، نمی اور فضائی دباؤ میں تبدیلی جسم کے دورانِ خون اور بلڈ پریشر کو متاثر کر سکتی ہے۔ یہی وجہ ہے کہ پہلے سے بیمار افراد میں فالج اور دل سے متعلق پیچیدگیوں کا خطرہ بڑھ سکتا ہے۔
ماہرین کا کہنا ہے کہ اس موسم میں وائرل انفیکشن، پانی کی کمی، معدے کے امراض اور بخار کے کیسز بھی زیادہ سامنے آتے ہیں، جو جسم پر اضافی دباؤ ڈال سکتے ہیں۔ اگر مریض اپنی ادویات باقاعدگی سے استعمال نہ کریں یا احتیاطی تدابیر نظرانداز کریں تو پیچیدگیوں کا امکان بڑھ جاتا ہے۔
یہ بھی پڑھیں: خیبرپختونخوا کے بیشتر اضلاع میں مطلع جزوی آبرالود رہنے اور بارش کا امکان ہے، محکمہ موسمیات
ڈاکٹروں کے مطابق فالج کی علامات کو بروقت پہچاننا انتہائی ضروری ہے۔ اگر کسی شخص کا چہرہ اچانک ایک طرف جھک جائے، ایک بازو یا ٹانگ کمزور ہو جائے، بولنے میں دشواری پیش آئے یا اچانک بینائی اور توازن متاثر ہو تو فوری طور پر قریبی اسپتال سے رجوع کرنا چاہیے، کیونکہ بروقت علاج جان بچانے اور مستقل معذوری سے بچنے میں اہم کردار ادا کرتا ہے۔
ماہرین شہریوں کو مشورہ دیتے ہیں کہ بارشوں کے موسم میں متوازن غذا استعمال کریں، پانی مناسب مقدار میں پئیں، روزانہ ہلکی جسمانی سرگرمی جاری رکھیں، بلڈ پریشر اور بلڈ شوگر کی باقاعدگی سے جانچ کروائیں اور ڈاکٹر کی ہدایت کے مطابق ادویات کا استعمال ہرگز ترک نہ کریں۔
