کولمبو ( پاک ترک نیوز) سری لنکا کی حکومت نے دو پہیہ گاڑیوں کے حادثات میں کمی لانے کے لیے کلووانچیکوڈی میں ملک کی پہلی خصوصی موٹرسائیکل لین بنانے کا فیصلہ کیا ہے۔ وزیر ٹرانسپورٹ، ہائی ویز اور شہری ترقی Bimal Rathnayake نے بتایا کہ اس منصوبے کے تحت موٹرسائیکل لین کو ربڑ ڈیوائیڈرز کے ذریعے دیگر ٹریفک سے الگ کیا جائے گا۔
انہوں نے کہا کہ منصوبے کا ڈیزائن مکمل ہو چکا ہے اور آئندہ چند ماہ میں اس پر عمل درآمد شروع ہونے کی توقع ہے۔ ان کے مطابق یہ منصوبہ ملائیشیا کے کامیاب ماڈل سے متاثر ہو کر تیار کیا گیا ہے، جہاں مخصوص موٹرسائیکل لین سے حادثات میں نمایاں کمی آئی ہے۔
وزیر نے بتایا کہ کلووانچیکوڈی کو اس پائلٹ منصوبے کے لیے اس علاقے میں موٹرسائیکلوں کے زیادہ استعمال کے باعث منتخب کیا گیا ہے۔ کامیابی کی صورت میں اس منصوبے کو ملک کے دیگر علاقوں تک بھی توسیع دی جائے گی۔
یہ بھی پڑھیں: موٹر وے ایم 4 کو تین رویہ کرنے کی منظوری
یہ اعلان ’’100 فار 100‘‘ نیشنل کارپوریٹ موٹرسائیکل سیفٹی پروگرام کی افتتاحی تقریب میں کیا گیا، جس کا مقصد نجی اداروں کے تعاون سے موٹرسائیکل سواروں میں ٹریفک قوانین سے آگاہی اور محفوظ ڈرائیونگ کی تربیت کو فروغ دینا ہے۔
