لاہور( پاک ترک نیوز) والڈ سٹی آف لاہور اتھارٹی نے اندرون شہر کی تمام مارکیٹوں میں فائر سیفٹی اقدامات یقینی بنانے کا فیصلہ کر لیا ۔ مارکیٹ کمیٹیوں کو آگ سے تحفظ کے اقدامات پر فوری عملدرآمد کی ہدایت جاری کر دی۔فائر سیفٹی سے متعلق والڈ سٹی بلڈنگ ریگولیشنز 2017 پر سختی سے عملدرآمد کے احکامات کر دیئے گئے۔
والڈ سٹی آف لاہور اتھارٹی کے مطابق تاریخی شہر کی تجارتی مارکیٹوں میں آتشزدگی کے بڑھتے خطرات کے پیش نظر ہنگامی اقدامات ہر صورت یقینی بنانا ہوں گے۔مارکیٹ کمیٹیوں کو تمام دکانداروں اور مارکیٹ انتظامیہ کو فائر سیفٹی ہدایات پر عملدرآمد یقینی بنانے کی ہدایت کی گئی۔
ہر مارکیٹ میں مناسب مقامات پر فعال فائر ایکسٹنگوشرز نصب اور ہر وقت قابلِ استعمال رکھنے کا حکم دے دیا گیا ، برقی آگ اور عام آتشزدگی دونوں سے نمٹنے کیلئے معیاری فائر ایکسٹنگوشرز کی تنصیب لازمی قرار دے دی گئی۔
ضرورت کے مطابق فائر الارم، فائر ڈیٹیکشن اور فائر فائٹنگ سسٹمز نصب اور فعال رکھنا لازمی قرار دیا گیا ،ناقص، خستہ حال یا اوور لوڈڈ بجلی کی وائرنگ اور الیکٹریکل کنکشنز فوری ختم کرنے کا حکم جاری کر دیا گیا ،مارکیٹوں میں تمام سوئچ بورڈز، بجلی کی تقسیم کے نظام اور وائرنگ کو محفوظ بنانے کی ہدایت کر دی گئی۔
یہ بھی پڑھیں: لاہور میں 83عمارتیں مخدوش قرار
ایمرجنسی راستے، سیڑھیاں اور فائر بریگیڈ کی رسائی کے تمام راستے ہر وقت کھلے رکھنے لازمی قرار دیا گیا،کسی بھی ہنگامی صورتحال میں فوری انخلا کیلئے ایگزٹ پوائنٹس پر رکاوٹیں ختم کرنے کی ہدایت کی گئی،تمام فائر سیفٹی آلات کی باقاعدہ جانچ، مرمت اور دیکھ بھال یقینی بنانا بھی لازمی قراردیا گیا۔
تمام مارکیٹوں کو سات روز کے اندر فائر سیفٹی اقدامات مکمل کر کے رپورٹ جمع کرانے کا حکم دے دیا گیا ،عملدرآمد رپورٹ کے ساتھ تصاویر بطور ثبوت والڈ سٹی آف لاہور اتھارٹی کو فراہم کرنا لازمی قرار دیا گیا ، مقررہ مدت میں ہدایات پر عمل نہ کرنے والوں کے خلاف قانونی کارروائی کا انتباہ جاری کر دیا گیا ۔
