واشنگٹن (پاک ترک نیوز )امریکا نے ایران کے جوہری پروگرام کے حوالے سے خفیہ معلومات حاصل کرنے کے لیے بڑا قدم اٹھا لیا۔ امریکی حکومت نے ایران کے جوہری پروگرام سے متعلق اہم معلومات فراہم کرنے والے افراد کے لیے 2 کروڑ ڈالر تک انعام اور ممکنہ طور پر محفوظ مقام پر منتقلی کی پیشکش کر دی ہے۔
امریکی سینٹرل کمانڈ، سینٹ کام نے سوشل میڈیا پلیٹ فارم ایکس پر جاری بیان میں کہا ہے کہ امریکی محکمہ خارجہ کے پروگرام ’’ریوارڈز فار جسٹس‘‘ کے تحت ایران کے جوہری پروگرام سے متعلق قابلِ اعتماد خفیہ معلومات فراہم کرنے والوں کو بھاری مالی انعام دیا جا سکتا ہے۔
اس کے علاوہ معلومات فراہم کرنے والے افراد کو ممکنہ طور پر محفوظ مقام پر منتقل کرنے کی سہولت بھی فراہم کی جائے گی۔
امریکی محکمہ خارجہ کا یہ انعامی پروگرام 1984 میں شروع کیا گیا تھا، جس کا بنیادی مقصد ایسی معلومات حاصل کرنا ہے جو امریکی قومی سلامتی اور شہریوں کے تحفظ میں مددگار ثابت ہو سکیں۔
امریکی حکام کے مطابق ایران کی جانب سے بین الاقوامی جوہری توانائی ایجنسی، آئی اے ای اے کے حفاظتی معاہدوں سے متعلق ذمہ داریوں پر مکمل عمل درآمد نہ ہونے کے باعث ایجنسی کو ایران میں سینٹری فیوجز جیسے اہم جوہری پرزہ جات کی تیاری اور ذخیرے سے متعلق معلومات کے تسلسل میں مشکلات کا سامنا ہے۔
تاہم امریکی محکمہ خارجہ نے یہ واضح نہیں کیا کہ کس نوعیت کی معلومات فراہم کرنے پر مکمل 2 کروڑ ڈالر کا انعام دیا جائے گا۔
دوسری جانب امریکی صدر ڈونلڈ ٹرمپ متعدد بار دعویٰ کر چکے ہیں کہ امریکی حملوں نے ایران کے جوہری پروگرام کو مؤثر طور پر تباہ کر دیا ہے۔
